Kryeministri i Kosovës, Avdullah Hoti ka folur në Kuvendin e Kosovës ku pritet të votohet Projektligji për Rimëkëmbje Ekonomike.
Hoti para deputetëve ka thënë se pakoja e propozuar nga qeveria e Kosovës është ndër më të mëdhat në rajon.
Ai tha se nga masat e marra deri tash nga qeveria, është arritur efekti i parandalimit të largimit nga bizneseve nga tregu.
“Në bazë të FMN-së, pakoja e parë në terma relative, pakoja jonë e rimëkëmbjes është njëra ndër më të mëdhatë. Aq sa kemi pasë mundësi, kemi mbërri dy efekte, parandalimin e largimit të bizneseve nga tregu dhe familjet të bijnë nën pragun e varfërisë. Ligji i sotëm krijon momentum të ri. Pra duke fillu nga skema për fondin e garantimit të kredive, qindra miliona euro që mbulohen nga fondi ku qeveria është kontribuese e madhe. Një pjesë e madhe shkon në bujqësi. Tërheqja e 10%shit nga Trusti, mbi 200 milion euro shtesë në buxhetin e familjeve. Të gjitha këto mjete të patatimuara. Përdorimi i mjeteve nga fondi i Privatizimit për të financuar fondin për rimëkëmbje ekonomike. Pastaj shtyerja e tatimit për koorporata për dy vjet”, tha ai.
Ai falënderoi PDK-në, për të cilën tha se amandamentet e tyre e kanë pasuruar ligjin.
“Janë amandamentet e opozitës, PDK-së që dua t’i falënderoj për mbështetjen e tyre. Unë i kam ftuar të dy partitë, dhe mendoj që këto amandamente e kanë pasuruar këtë ligj”, tha ai.
Hoti po ashtu tha se synohet që një pjesë e madhe e fondeve të shpërndahen para vitit të ri.
