Kryetari i Aleancës për Ardhmërinë e Kosovës (AAK), Ramush Haradinaj ka kujtuar kryeheroin e kombit shqiptarë Gjergj Kastriotin Skënderbeun, në 553 vjetorin e vdekjes së tij.
Ai ka thënë se çdo përvjetor kujtimi për të, është një rast reflektimi rreth ndjenjave kombëtare.
‘Në 553-vjetorin e vdekjes së Gjergj Kastriotit-Skënderbeut, kujtojmë Kryeheroin që bashkoi shqiptarët. Çdo përvjetor kujtimi për të, është një rast reflektimi rreth ndjenjave kombëtare. Skënderbeu dhe veprat e tij paraqesin përveç etjen për liri, edhe ndjenjën e bashkimit, shpërndarjen e meritave të asaj që arrihet. Këtë e vërteton më së miri thënia lapidare kur kishte arritur në trojet arbërore: Lirinë nuk ua solla unë, atë e gjeta në mesin tuaj’, ka shkruar ai në Facebook.
Më tej Haradinaj ka thënë se sa herë e kujtojmë Skënderbeun, e gjejmë shëmbëlltyrën e tij te secili martir, hero e dëshmor.
‘Sa herë kujtojmë Skënderbeun, e gjejmë shëmbëlltyrën e tij te secili martir, hero e dëshmor, në çdo etapë të historisë sonë të lavdishme. E gjejmë te secili luftëtar i lirisë, te zemra e çdo shqiptari. Lavdi e përjetshme, ka thënë Haradinaj.
