Kandidati e iniciativës “Guxo” në listën e Lëvizjes Vetëvendosje, Faton Peci thotë se në bazë të dhënave që posedon ai ka fituar mandatin e deputetit.
“Informata zyrtare nuk kam, por të dhënat nga terreni flasin se unë do të jem deputet i ardhshëm i Kuvendit të Kosovës”, deklaroi Peci në “Debat Plus”.
Bashkëpunëtori i Vjosa Osmanit thotë se rezultatet e 14 shkurtit për Lëvizjen Vetëvendosje lidhen me dobësitë e LDK-së.
“Rritja e Vetëvendosjes lidhet ekskluzivisht me defektet që kanë shoqëruar Lidhjen Demokratike të Kosovës”, tha ai.
Peci thotë se rrjedhja e votës për LDK-në ka filluar qysh nga viti 2014.
“Unë edhe Vjosa Osmani që në atë kohë kemi tërhequr vërejtjen për një mori vendimesh të gabuara…Prishja e koalicionit me LVV-në dhe përjashtimi i Vjosa Osmanit nga partia ishte ndër vendimet më të gabuara të LDK-së që i kushtuan kësaj të fundit në zgjedhje”.
Edhe kryetari i dorëhequr i LDK-së Isa Mustafa thotë se votuesi i LDK-së në zgjedhjet e 14 shkurtit ka rrjedhur në Vetëvendosje.
