Reagon për herë të parë kandidatja për deputete, të cilës iu vodhën votat për Meliza Haradinajn

Aktuale

Reagon për herë të parë kandidatja për deputete, të cilës iu vodhën votat për Meliza Haradinajn

Më: 6 mars 2021 Në ora: 21:18
Albana Bytyqi

Kandidatja për deputete nga radhët e Aleancës për Ardhmërinë e Kosovës, Albana Bytyqi, ka reaguar pas publikimit të skandalit të madh me manipulimin e votave.

Përmes një postimi në rrjetin social Facebook, Bytyqi ka thënë se pavarësisht tentimeve që vullneti qytetar të devijojë, ajo do jetë zëri i qytetarëve dhe do angazhohet deri në zbardhjen e të vërtetës.

Ajo thekson se Paneli Zgjedhor për Ankesa dhe Parashtesa duhet të bëj rinumërimin e votave dhe Prokuroria duhet të merr masa për të hetuar këto skandale.

Ky reagim erdhi pas publikimit të hulumtimit nga Insajderi ku shihet se ministrja e Punëve të Jashtme në detyrë, Meliza Haradinaj Stublla, si duket nuk mori mjaftueshëm vota për të siguruar një ulëse në Kuvendin e Republikës së Kosovës.

Por ‘këtë problem’ e zgjidhi bashkëshorti i saj, Dardan Stublla, duke i blerë me 6 mijë euro katër komisionerë, të cilët i kanë dëmtuar dy kandidate tjera dhe kanë favorizuar Haradinaj Stubllën.

Arbër Krasniqi, një nga të përfshirët në videoincizim, dëshmon se grupi i komisionerëve ka pasur marrëveshje me Stubllën që këtë manipulim votash ta bëjnë për gjashtë mijë euro, por ata kanë marrë vetëm katër mijë prej tyre.

Komisionerët në Qendrën e Numërimit dhe Rezultateve manipuluan me rezultatet, duke vjedhur votat e kandidates së AAK-së për deputete, Florentina Gjergjaj, e më pas edhe të Albana Bytyqit, vetëm e vetëm që t’ia sigurojnë votat e nevojshme për ulësen e deputetit kryediplomates në detyrë, Meliza Haradinaj Stublla.

Postimi i plotë i Bytyqit:

Reagim Publik

Të dashur qytetarë,

Skandali i fundit i publikuar në media për formularët e rezultateve të kandidatëve tregon se për disa persona ”nuk është me rëndësi se sa të votojnë, e rëndësishme është kush t’i numëron!”

Pavarësisht këtyre tentimeve, ne nuk do të lejojmë që vullneti juaj të devijojë! Ky vullnet duhet të jetë i paprekshëm, prandaj unë do të jem zëri juaj dhe do të angazhohem deri në zbardhjen e të vërtetës!

Blerja e komisionerëve dhe favorizimi i kandidatëve të caktuar është e patolerueshme. PZAP duhet të bëjë rinumërimin e votave dhe Prokuroria duhet të merr masa për të hetuar këto skandale!

Albana Bytyqi

commentFirst article
Sot mund të lexoni Shfletoni kopertinat