Këshilltari politik i kryeministrit në detyrë, Avdullah Hoti, Kastriot Jahaj është kërcënuar dje përmes telefonit nga një person, i cili dyshohet t’i ketë thënë po që se nuk ia sjellë paratë, do ta privonte nga jeta bashkëshorten e tij.
Ky person e kishte thirrur Jahajn dje rreth orës 08:48 përmes një numri privat, derisa ai ishte në banesën e tij në Fushë Kosovë.
Burimet bëjnë me dije se personi që dyshohet se e kërcënoi Jahajn i tha atij në telefon se “ti e din se kush jam unë”.
Por me të raportuar rastin në Polici, Jahaj ka deklaruar se nuk e njeh personin që e ka kërcënuar atë.
Lidhur me këtë ngjarje, është informuar edhe Prokurori i Shtetit dhe rasti është cilësuar si kanosje.
Sinjali ka kontaktuar para pak minutash edhe me Jahajn për të marrë një konfirmim zyrtar, por i njëjti ka refuzuar të flasë, me arsyetimin se “është me familje”.
