Kandidati për deputet nga Lëvizja Vetëvendosje Liri Loshi, ka thënë se Lidhja Demokratike e Kosovës, duhet të reformohet, pas largimit të Vjosa Osmanit.
Ai ka thënë se Osmani i ka bërë favor Lumir Abdixhikut me largimin e saj dhe për këtë, sipas tij, ajo duhet të shpërblehet me votat për zgjedhjen e saj si presidente, përcjell Bota sot.
Sipas tij, LDK-ja dhe Abdixhiku nuk duhet të mbajnë mëri me Osmanin, pos nëse dëshiron të udhëheq me logjikën e Isa Mustafës.
Postimi i plotë i Loshit në Facebook:
Me largimin e saj nga LDK-ja, Vjosa Osmani i ka dhënë mundësinë këtij subjekti të reformohet. Sikur Vjosa të kish ndenjur aty, zëri i saj nuk do të dëgjohej, ose do të dominohej nga zëri i trashë i burrave. Tash LDK-ja është mirë të vazhdojë me reformimin e saj, pra ta trasojë rrugën e filluar nga Vjosa. Për këtë favor që i ka bërë Lumir Abdixhikut dhe LDK-së, pra një LDK-je që do të dalë nga procesi i reformimit, Vjosa duhet të shpërblehet me votën e LDK-së për presidente dhe jo të kushtëzohet në asnjë mënyrë.
Vjosa Osmani nuk ka mëri me Lumir Abdixhikun as LDK-në, prandaj as Lumiri dhe LDK-ja nuk duhet të mbajnë mëri me Vjosën. Nuk ka asnjë arsye, pos nëse Lumir Abdxhiku në vend se ta reformojë partinë, ka vendosur ta udhëheq atë me logjikën e Isës. Logjika e Isës e ka sakatosur LDK-në keq, prandaj ajo logjikë duhet të ruhet në muzeun e LDK-së për ta përkujtuar dështimin. LDK-ja ka nevojë për një Lumir të suksesshëm, ashtu sikurse Kosova që nuk ka nevojë për një LDK të dështuar.
