Menaxheri i Projektit për nismën "Luftimi i krimit të rëndë në Ballkanin Perëndimor-IPA 2019" Carlo Verdiglione nga Ministria e Punëve të Brendshme të Italisë, u takua dje në Prishtinë me ministrin e Punëve të Brendshme dhe Administratës Publike Xhelal Sveçla dhe drejtorin e Përgjithshëm të Policisë së Kosovës Driton Mehmeti.
Ai shoqërohej nga ambasadori i Italisë në Kosovë, Nicola Orlando dhe eksperti rezident në Prishtinë, Giovanni Mastrolorito.
Në takimet miqësore dhe të frytshme, Verdiglione njoftoi homologët kosovarë për progresin në zbatimin e projektit.
"Ky është një projekt rajonal nga i cili përfiton nga Shqipëria, Bosnjë-Hercegovina, Kosova, Maqedonia e Veriut, Mali i Zi dhe Serbia", tha Verdiglione, menaxher i lartë në Departamentin e Sigurisë Publike të Ministrisë së Brendshme Italiane.
“Projekti mbështet forcat e policisë së Kosovës në kryerjen e aktiviteteve operacionale që synojnë luftimin e krimit të organizuar. Gjithashtu, ky projekt promovon pjesëmarrjen e Kosovës në mekanizmat e bashkëpunimit të BE-së, siç është Platforma Evropiane Multifunksionale Kundër Kërcënimit Kriminal”, tha ai.
Verdiglione theksoi se qasja e projektit është të mbështesë përfituesit dhe t'i ndihmojë ata të shfrytëzojnë të gjitha mjetet ndërkombëtare të bashkëpunimit policor.
Financuar nga Komisioni Evropian, Italia dhe Gjermania në kuadër të programit Instrumenti i Para-Anëtarësimit IPA 2019, programi "Luftimi i Krimit të Rëndë në Ballkanin Perëndimor" do të investojë rreth 18 milionë euro deri në vitin 2023 dhe përqendrohet në hetim, pjesëmarrjen dhe kontributin në BE, si dhe strukturat dhe vlerësimet e bashkëpunimit ndër-rajonal, dhe shkëmbimi i informacionit.
