Anëtari i Kryesisë së LDK-së, Ardian Shala, ka thënë se Programi i Qeverisë për katër vitet e ardhshme është shumë i thatë. Ai ka thënë se atij programi i mungojnë konkretizimet në afatet kohore për implementimin e planeve që ka paraqitur Qeveria.
“Si program është mjaft i thatë, nuk ka detajizime, nuk parashihet se kur do ndodhin ato. Kjo i bie si një fontanë dëshirash ‘duhet të bëhet’ e nuk ka detajizime. Sidomos te investimet kapitale nuk kemi pa që ka diçka. Po ashtu asnjë plan si do ti sigurojnë vaksinat në periudha të ndryshme kohore”.
“Nuk ka të specifikuar çka do bëj me sektorë të rëndësishëm, si ai i kardiokirurgjisë... Te mbledhja e premiumeve, ka paqartësi kur do mblidhen për çështjen e sigurimeve shëndetësore. Nuk ka specifikim. S’ka data për nisjen e implementimit të sistemit informativ shëndetësore”, ka shtuar Shala.
Shala ka reaguar edhe ndaj deklaratës së deputetit të VV-së, Mefail Bajqinovcit, i cili tha se brenda dy javësh do ta kemi kontratën e parë për vaksina. Ka thënë se Qeveria nuk ka treguar plan konkret për këtë, ndërsa është shprehur skeptik për arritjen e kontratës.
“Ndarje të buxhetit për këtë nuk e dimë që ka. Urojmë ta realizojnë por nuk ka plan konkret se kur do t’i realizojnë këto furnizime me vaksina. Shihet që kur dihet që një ministër (Zemaj) thotë se kontrata është në pritje ndërsa Vitia nuk jep asnjë detaj, çka ka ndodhë me atë kontratë. Me këtë qasje jemi shumë skeptik që këta do t’i bëjnë këto që vetë i kanë shënuar në letër sa i përket çështjes së vaksinave”, ka thënë ai në Interaktiv.
Shala ka thënë se kah muaji qershor mund të bëhen publike emrat e kandidatëve të LDK-së për kryetarë komunash për zgjedhjet e vjeshtës.
