Mjekja Besa Kolloni është sulmuar fizikisht në qendrën e vaksinimit në Dragash, nga një asamblist i komunës së Dragashit bashkë me babanë e tij.
Sipas një reagimi të publikuar nga një grup i specializantëve në Facebook, thuhet se specializantja e gjinekologjisë Dr. Besa Kolloni, është sulmuar nga dy persona, babë e bir, gjatë kohës së saj të pauzës në qendrën e vaksinimit.
Sipas këtij reagimi, sulmuesi kishte kërkuar të vaksinohej ndonëse nuk i ishte caktuar termin sipas kritereve të planit të vaksinimit nga Ministria e Shëndetësisë. Pas refuzimit të vaksinimit ka ndodhur edhe sulmi fizik.
Përkundër sulmit fizik, i njëjti në fund është vaksinuar nga kjo qendër.
Lexoni reagimin e plotë:
Në emër të specializantëve të Gjinekologjisë dhe emrin tim personal shprehi indinjaten tonë ndaj sulmit verbal e fizik drejtuar koleges sonë Dr.Besa Kolloni, nga L.R dhe djali i tij G.R asambleist i KK Dragash, në vendin e punës gjatë kohës së saj të pauzës. Kur Dr. Besa ka lënë anash ngritjen e saj profesionale për të ndihmuar në vaksinimin e popullates në komunën e Dragashit, asaj nuk i është ofruar as siguria minimale fizike e intelektuale gjatë ofrimit të shërbimeve.
Përtej kësaj është e dhimbshme dhe tragji-komike që personat përgjegjes për vaksinim në atë qendër i mundesojnë një personi të tillë marrjen e vaksinës pas sulmit sikur të mos kishte ndodhur asgjë.
Kërkojmë përkrahje institucionale e popullore, në kohën kur ka numër të limituar të vaksinave, është e turpshme ti mundësohet vaksinimi kujdoqoftë, pamarrëparasyshë kapajdallëkun e pozitat politike që ai bartë.
Derisa ne si grup do të përkrahim edhe privatisht Dr Besën pergjatë procesit ligjor që tashmë është inicuar, kërkojmë nga institucionet përgjegjese si Ministria e Shëndetësisë, Ministra Punëve të Brendshme, Oda e Mjekëve dhe tjera relevante, të ndërmarrin masat e duhura për këtë rast dhe hapa konkret drejt mos përsëritjes së rasteve të ngjashme.
