Ish deputeti i Lidhjes Demokratike të Kosovës, Faton Bislimi e vlerëson si të rëndësishëm nderin që Presidentja Vjosa Osmani po i bën Beau Biden-it, djalit të ndjerë të Presidentit Joe Biden!
Ai në një postim në facebook ka thënë se është për çdo lëvdatë e mirënjohje video-mesazhi i Presidentit Biden për Kosovën!
Bislimi kujtoi me këtë rast se miqësia unike me SHBA-në dhe presidentin Biden u ngjiz nga kongresisti Joe DioGuardi dhe Liga Qytetare Shqiptaro-Amerikane.
“Por, t'i kthehemi pak historisë, ngase kem një thesar kombëtar që quhet Liga Qytetare Shqiptaro-Amerikane dhe një hero të gjallë që quhet Joe DioGuardi, ish-kongresist amerikan, nga i cili u ngjiz miqësia jonë unike me SHBA-të por edhe me Joe Biden. Fiks 30 vite më parë, Joe Biden asokohe Senator dhe Kryetar i Nënkomitetit për Çështje Evropiane në Komitetin për Punë të Jashtme të Senatit të SHBA-ve, kishte ftuar kolegun e tij nga Kongresi, DioGuardin, për të dëshmuar për Kosovën, pas diskutimeve paraprake dhe miqësore që këta dy kishin pasë për Kosovën”, shkroi Bislimi në Facebook.
Siç tregon Bislimi, ishte ky dëgjim kongresional në Senatin amerikan i mbajtur më 21 shkurt 1991, që trasoi rrugën e përkrahjes së Biden ndaj Kosovës.
“Ishte Joe DioGuardi ai që na e bëri Joe Biden mik të kombit tonë! Këtë e pohon edhe vet Joe Biden në një ngjarje të organizuar nga Liga Qytetare Shqiptaro-Amerikane nën udhëheqjen e DioGuardit dhe znj. Shirley Cloyes DioGuardi, më 2002! Çdo respekt për Biden është meritor, po aq sa çdo mirënjohje për DioGuardin është e pamjaftueshme! Krenar me dy dekadat e punës sime me DioGuardin dhe Ligën; krenar me mbështetjen që i dhamë Biden në fushatën e tij presidenciale! #Proud #AlbanianAmericanCivicLeague . -- Foto: Ftesa e datës 8 shkurt 1991 nga Biden për DioGuardin për të dëshmuar për Kosovën në Senatin amerikan!”, përfundoi Bislimi.
