Pas disa ditëve të tensionuara, Serbia dhe Kosova në Bruksel, kanë arritur marrëveshje për zgjidhjen e problemit të reciprocitetit të targave.
Për këtë marrëveshje, ka raportuar edhe gazeta zvicerane Blick.ch, transmeton "Bota sot".
Ajo ia kushtoi një artikull të veçantë kësaj ngjarje, duke përmendur faktin se kjo marrëveshje ka shmangur rrezikun për përshkallëzimin e situatës.
Lajmin për arritjen e kësaj marrëveshje e dha Përfaqësuesi i BE -së për Ballkanin Perëndimor, Miroslav Lajçak, përmes një postimi në Twitter të enjten.
"Ne kemi një marrëveshje!", u shpreh Lajçak.
Pas dy ditësh negociatash intensive, është arritur kjo marrëveshje për uljen e tensioneve. Kosova premtoi tërheqjen e njësive speciale të policisë nga kufiri dhe heqjen e pengesave në rrugë, raporton Blick.ch, transmeton "Bota sot".
Kjo fillimisht duket se ka shmangur rrezikun e një përshkallëzimi të dhunshëm. Sipas deklaratës së bërë nga Lajçak, forca mbrojtëse e KFOR-it e udhëhequr nga NATO supozohet të sigurojë një "mjedis të sigurt dhe liri të lëvizjes". Një grup pune me pjesëmarrjen e përfaqësuesve të BE -së do të përpunojë një zgjidhje të përhershme brenda gjashtë muajve.
Presidentja e Komisionit Evropian Ursula von der Leyen ndërmjetësoi midis dy qeverive në një udhëtim në Prishtinë dhe Beograd. Bisedimet me negociatorët nga të dyja palët u mbajtën në Bruksel në të njëjtën kohë. Situata ishte përkeqësuar ndjeshëm pak më shumë se një javë më parë pasi Kosova nuk i njihte më targat serbe. /BS
