Situata në pikat kufitare Jarinje dhe Bërnjak të cilat lidhin Kosovën me Serbinë, është e qetë dhe procesi i reciprocitetit për targat po zhvillohet normalisht.
Nga Kosova për në Serbi vërehen dhjetëra automjete duke pritur, ndërsa nga drejtimi I kundërt kolona arrinë deri në dy kilometra, dhe vozitësit detyrohen të mbulojnë simbolet shtetërore nëpër targat e tyre.
Doganierët dhe policia kufitare janë duke punuar me intenzitet të shtuar në kryerjen e detyrave të tyre, derisa ushtarët e KFOR-it po vëzhgojnë situatën nga disa kilometra larg këtyre pikave.
Qytetarët e pakët të cilët kanë pranuar të flasin, kanë mendime të ndryshme rreth kësaj mënyre të zgjidhjes së problemit.
Disa mendojnë se këto pritje janë shumë të rënda për ta, ndërsa ka edhe të tillë që thonë se pritjet nuk janë fare të vështira dhe se kjo marrëveshje është e duhur.
Lubomir Tripkovic, nga qyteti i Sijenicës të Serbisë, i cili po udhëtonte për në Leposaviq, bëri të ditur për KosovaPress se kjo çështje duhet të zgjidhet, por jo në mënyrë që barra të bie mbi kurrizin e popullatës.
Tripkovic: Duhet të zgjidhet kjo çështje, por jo në këtë mënyrë që barra të bie në popullatën
“Procedura është e vështirë sepse po nxitojmë për në fakultet, fëmiu po pret dhe do të kemi problem nëse vonohemi, ndërsa sa I përket pritjes nuk është problem për shkak se në jetë për gjithçka duhet pritur[…]Nuk e di, duhet të zgjidhet kjo çështje, por jo në këtë mënyrë që barra të bie në popullatën”, ka thënë Tripkovic.
Një qytetar tjetër i cili nuk deshi ta tregoj emrin, tha se pritjet e tilla janë shumë të rënda dhe se kjo marrëveshje nuk është e duhur.
X: Pritja për ne është shumë e rëndë
“Kjo pritje është shumë e rëndë për neve[...]Nuk është kjo zgjidhje e duhur”, tha ai.
Në anën tjetër, një qytetar nga Novi Pazari me emrin Esat, u shpreh se pritjet nuk janë të rënda fare për të dhe se marrëveshja mes Kosovës e Serbisë për targat është e qëlluar.
Esat: Është marrëveshja e duhur
“Kjo pritje për neve nuk është e rëndë fare[…]Po, është marrëveshje e duhur dhe më së miri kishte me qenë që të udhëtojmë nga të dyja drejtimet pa probleme”
