Ambasada britanike në Prishtinë ka mirëpritur raportin preliminar të Misionit Vëzhgues të BE-së dhe konkluzionet e tij dhe është shprehur e kënaqur që zgjedhjet u zhvilluan në mënyrë shumë paqësore.
Njëherësh ambasada britanike konsideron se një demokraci e fortë dhe një sistem i shëndoshë zgjedhor është jetik për përparimin e Kosovës.
“Jemi të kënaqur që zgjedhjet u zhvilluan në një mënyrë shumë paqësore dhe se shumica e qytetarëve të Kosovës ishin në gjendje të shprehnin vullnetin e tyre demokratik përmes votës. Gjithashtu, përgëzojmë shoqërinë civile për rolin e saj të rëndësishëm në vëzhgimin e zgjedhjeve”, thuhet në komunikatë.
Ndërkohë që raporti preliminar vë në dukje një numër shqetësimesh përfshirë edhe frikësimin e votuesve serbë të Kosovës, votimin jashtë Kosovës si dhe listat e pasakta të votuesve, Ambasada britanike shpreson se autoritetet e Kosovës do të ndërmarrin veprime ndaj atyre që janë përfshirë në frikësime apo keqpërdorime zgjedhore dhe të punojnë pa humbur kohë për të adresuar dobësitë e identifikuara në sistemin zgjedhor.