Historiani Shkodran Imeraj, ka thënë se deklaratat e fundit në vend, për ndarjen e Kosovës, janë përgatitje e qytetarëve të Kosovës, që Asociacioni i Komunave me shumicë serbe, të marrë kompenteca ekzekutive.
Imeraj në një reagim në Facebook, ka thënë se me dhënien e përgjegjësive ekzekutive për ASK-në, do të preken themelet e Kushtetutës dhe parimet bazë të Pakos së Ahtisarit, përcjell Bota sot.
Ai ka propozuar që në rast se bëhet ndyshimi i kufijve në Ballkan, shqiptarët e Kosovës dhe ata të Kosovës Lindore, të bashkohet me shtetin amë, Shqipërinë.
Reagimi i plotë i Imerajt:
Deklaratat dhe komentet e fundit, kinse për ndarjen territoriale të Kosovës, nuk janë asgjë më tepër se përgatitje e opinionit dhe qytetarëve të Republikës së Kosovës, që Asociacioni i Komunave Serbe (AKS) të merr kompetenca ekzekutive, duke krijuar kështu nivelin e tretë ekzekutiv në institucionet e shtetit.
Me dhënien e përgjegjësive ekzekutive për Asociacionin e Komunave Serbe, do të preken themelet e Kushtetutës së Republikës së Kosovës dhe parimet bazë të Pakos së Ahtisarit.
Ndërhyrjet në fundamentin e Kushtetutës dhe Pakos, hapin "Kutinë e Pandorës". Nëse ndërmerret ndryshimi i kufijve në Ballkan, atëherë rruga më e mirë për shqiptarët e Kosovës përfshirë këtu edhe Luginën e Preshevës është bashkimi me shtetin amë, Shqipërinë./BS