Zëvendëskryeministri i Kosovës dhe shefi i diplomacisë, Behgjet Pacolli ka njoftuar se para ministrave të Jashtëm të BE’së dhe Ballkanit Perëndimor, ka kërkuar zbatimin e plotë të Marrëveshjes së Energjisë midis Kosovës dhe Serbisë.
Nëpërmjet një shkrimi në Facebook, Pacolli ka treguar se zbatimi i kësaj marrëveshje është me rëndësi vitale.
Pacolli po merr pjesë në takimin joformal të Ministrave të Jashtëm të BE’së dhe Ballkanit Perëndimor me temën “Infrastruktura kritike dhe Digjitalizimi” që po mbahet në Vjenë.
Shkrimi i plotë i Pacollit në Facebook:
Siguria energjetike e Kosovës mbështetet në Termocentralet, funksionaliteti i të cilave varet nga rrjedha konstante e ujit për të ftohur gjeneratorët. Prandaj, kërkova me ngulm zbatimin e plotë të Marrëveshjes së Energjisë midis Kosovës dhe Serbisë, pasi që është me rëndësi vitale.
Këtë e kërkova gjatë adresimit tim para Ministrave të Jashtëm të BE-së dhe Ballkanit Perëndimor, të cilët po marrin pjesë në takimin joformal në Vjenë, me temën “Infrastruktura kritike dhe Digjitalizimi”.
Në vazhdim, referova në lidhje me kërcënimet në rritje të karakterit hibrid, për të cilat vlerësova se bashkëpunimi është i domosdoshëm.
Përshëndeta nismat, si synimi për të nisur anketat e kërcënimeve hibride me vendet e Ballkanit Perëndimor, që na lejojnë të shqyrtojmë se si aplikohen kërcënimet në vende të veçanta, si dhe në rajonin tonë.
Në margjina të këtij aktiviteti, të organizuar nga Austria, si kryesuese e radhës së Presidencës së BE-së, zhvillova një sërë takimesh me homolog nga BE-ja dhe rajoni.
