Deputetja e Lidhjes Demokratike të Kosovës Vjosa Osmani thotë se në idenë për shkëmbim territoresh presidenti Hashim Thaçi nuk e ka përkrahjen e askujt. Thotë se po mundohet ta vërë Kuvendin para aktit të kryer kur është fjala për shkëmbim territoresh.
“Nuk janë vetëm partitë opozitare që po e kundërshtojnë idenë për ndryshimin e kufijve. Por janë edhe partitë në koalicionin qeverisës. Në radhë të parë AAK’ja dhe Nisma. Z. Thaçi është total i vetëm në këtë proces. Nuk e ka pas parlamentin, as qeverinë dhe mbi të gjitha nuk e ka popullin pas vetës”, tha Osmani.
Deputetja Osmani thotë se Thaçi po udhëheq ilegalisht dialogun me Serbinë.
“Është duke tentu që idetë që janë tepër të rrezikshme, ide që janë luftënxitëse e jo vetëm për Kosovën por edhe rajonin t’i çojë përpara si ide të tij personale, ta merr pronësinë e këtij procesi...dhe të tentojë që të vendosë Kuvendin e Kosovës para aktit të kryer. Kjo është ajo çka po tenton z. Thaçi”, tha Osmani.
