Senatori amerikan, Ron Johnson, është shprehur se presidenti i SHBA-ve, Donald Trump, është i interesuar që të zgjidhë problemin mes Kosovës dhe Serbisë.
Ai tutje ka thënë se njerëzit në Kosovë dhe Serbi duhet të jenë të sigurt që administrata amerikane është e fokusuar në këtë problem dhe se e dinë rëndësinë e paqes në Ballkan.
“Administrata është e interesuar në këtë. Kam udhëtuar tre herë në Ballkan, sepse asistenti i sekretarit të Shtetit, Wess Mitchell, më ka inkurajuar. Njerëzit atje duhet të jenë të sigurt që administrata është e interesuar të gjejë një zgjidhje”, ka thënë ai.
Johnson ka ripërsëritur se SHBA-ja nuk kanë vija të kuqe kur është puna tek arritja e një marrëveshjeje për të cilën liderët pajtohen.
“Ne duam të bëjmë gjithçka që të inkurajojmë presidentin Vuçiq dhe zyrtarët nga Prishtina që t’i inkurajojmë në arritjen e një zgjidhjeje të problemit afatgjatë, dhe të arrijnë një marrëveshje e cila do të siguronte paqe në Ballkan”, ka thënë ai.
Kujtojmë se kundër idesë së korrigjimit të kufijve në Ballkan tashmë ka dalë Gjermania.
