Dy të rinj shqiptarë rrihen barbarisht në Serbi, sepse flisnin shqip - Bota Sot
Dy të rinj shqiptarë rrihen barbarisht në Serbi, sepse flisnin shqip

Aktuale

Dy të rinj shqiptarë rrihen barbarisht në Serbi, sepse flisnin shqip

Nga: Sevdail Hyseni Më: 8 tetor 2018 Në ora: 09:53
Foto ilustrim

Gazeta e përditshme  “Danas”, nga Vojvodina, bënë të ditur se dy të rinj shqiptarë rrihen në Novi Sad, gjatë këtij vikendi, ndërmjet të shtunës dhe të dielës, njëri prej të cilëve është plagosur rëndë dhe jeta e tij është në rrezik.

Në rrugën “Futoshkoj”, në stacionin e taksive pranë Ruletit “Gaja”, dy të rinj me kombësi shqiptare G.B.  dhe Ç.M., të lindur në vitin 1999, sulmohen "nga katër persona të panjohur deri tani, pa asnjë arsye, vetëm pse bisedonin me njëri-tjetrin në gjuhën shqipe", thuhet në kumtesën e  Amzës Shqiptare nga Novi Sad, të nënshkruar nga kryetari i saj Demo Berisha.

Shqiptari me inicialet Ç.M, ka lëndime të rënda: ka të thyer kockat e kokës dhe gjakderdhje në tru. Ai, është duke u operuar në  Qendrën Klinike të Vojvodinës dhe jeta e tij është në rrezik.

I riu tjetër me inicialet G.M. gjithashtu, ka plagë të rënda, por jeta e tij nuk është në rrezik, thuhet në deklaratën e Amzës Shqiptare nga Novi Sadi.

Ky incident i rëndë ndëretnik i shkaktuar nga huliganët e panjohur, ka zgjuar edhe reagimin e Shoqërisë Civile “Perspektiva”, nga Lugina e Preshevës, e cila ka reaguar ashpër këtë incident, duke kërkuar  që rasti të zbardhet sa më shpejt dhe aktorët të dënohen para drejtësisë, ndërsa të rinjve shqiptarë u dëshiron shërim sa më shpejtë.

Gjithashtu, Shoqërisë Civile “Perspektiva”, kërkon nga Këshilli Kombëtar Shqiptar dhe autoritet e pushteteve lokale në Luginë të Preshevës, të reagojnë ndaj këtyre dukurive negative me të cilët po rrezikohet gjuha shqipe në Serbi dhe njerëzit me origjinë shqiptare, të privuar nga të drejtat më elementare siç është ajo e komunikimit në gjuhën amtare.

Shfaq komentet
comments powered by Disqus
Më të lexuarat
Sot mund të lexoni Shfletoni kopertinat
Sondazh
test
Tjera