Kryetari i Kuvendit të Kosovës, Kadri Veseli ka ngushëlluar familjen Avdiu për ndarjen nga jeta të Hamit Avdiut, ku ka vlerësuar se “burrat si baca Hamit i shërbyen atdheut pa kursyer asgjë dhe pa u lëkundur asnjëherë nga rruga e lirisë”.
“Mora lajmin për vdekjen e Hamit Avdiut. Që nga vitet ‘80 të shekullit të kaluar, shtëpia e bacës Hamit ishte bazë e fuqishme e lëvizjes sonë ilegale për lirinë e Kosovës. Burrat si baca Hamit i shërbyen atdheut pa kursyer asgjë dhe pa u lëkundur asnjëherë nga rruga e lirisë. Prandaj, gjithmonë do t’i kujtojmë e nderojmë me respekt e krenari. Ngushëllime familjes Avdiu, miqve dhe gjithë atyre që paten rastin ta njohin bacën Hamit!” ka shkruar Veseli në letrën ngushëlluese për familjen Avdiu.