Ministri serb i Mbrojtjes, Aleksandar Vulin, ka reaguar pas deklaratës së ambasadorit amerikan në Beograd, Kyle Scott për pavarësinë e Kosovës.
Gjatë ditës së sotme ambasadori amerikan në ikje, Kyle Scott, deklaroi se, Qeverisë së Kosovës nuk mund t’i referohemi si “e ashtuquajtur”, ngase sipas tij e njëjta është e zgjedhur nga populli dhe se Kosova është një shtet sovran dhe demokratik.
Kjo deklaratë e ambasadorit Scott ka ngjallur reagimin e ministrit serb të Mbrojtjes, Aleksandar Vulin.
Siç shkruan media serbe, Vulin ka deklaruar se, “me arrogancën e tij, Scott ka harruar se Serbia nuk është koloni dhe nuk mund ta zhduk dinjitetin e saj”.
“Më vjen keq që Ambasadori Scott, arrogancën e tij nuk u përpoq ta shfaq në ndonjë ngjarje me presidentin Vuçiq, sepse atëherë ai do të fluturonte kokulur nga Qeveria. Por Serbia së paku e ka parë se kush lufton për Serbinë, e kush mendon vetëm për pjesën e tyre të poshtme”, tha Vulin.
Ai po ashtu ka shtuar se, Serbia nuk është koloni dhe se sipas tij, Kosova është e ashtuquajtur dhe nuk është e pavarurur sepse ajo nuk është as anëtare e OKB-së.
“Ambasadori Scott, me arrogancën e tij, ka harruar se Serbia nuk është koloni dhe nuk mund ta zhduk dinjitetin e saj. Se Kosova është e ashtuquajtur dhe nuk është e pavarur, flet edhe fakti se nuk është anëtare e OKB-së. Apo, ndoshta, Ambasadori Scott ka filluar të flasë e mendojë në emër të Kombeve të Bashkuara”, tha ministri serb.
