Kryetari i VV’së Albin Kurti ka kritikuar edhe një herë institucionet udhëheqëse në vend.
Këtë herë theksi i tij ishte te çmimi i lartë i naftës, dhe degradimin e bujqësisë në vend.
Për shkak të mungesës së reshjeve të shiut bujqit në Kosovë janë në pozitë të vështirë derisa Qeveria sipas deputetit nuk po bën asgjë për sistemin e ujitjes.
Ai thotë se me një Qeveri të udhëhequr nga partia që ai drejton çmimi i naftës për bujqit do të lirohej duke përkrahur bujqësinë.
Shkrimi i plotë i Kurtit në Facebook:
Që prej shpalljes së pavarsisë, nafta kurrë s’ka qenë më shtrejtë: 1 litër = 1 euro e 22 centë. Edhe më kaherë se kaq, nuk ka pasur këso thatësie në muajt tetor e nëntor. Shumë bujq sivjet nuk kanë mbjellë fare, kurse atyre që kanë mbjellë nuk po iu mbin fara. Shumë moti bujqësia kosovare s’ka qenë kaq dobët e importi kaq i lartë.
Sistemet e ujitjes janë me shumë defekte teknike dhe pa investime qeveritare. Arat pa ujë shiu prej qielli, janë edhe pa ujitje kanalesh tokësore. Sipër tyre, traktorë të rrallë e që të gjithë të vegjël. Fara e plehu edhe të shtrenjta edhe pa cilësi. Një shtet që e lë tokën e vet djerrë, nuk ka çfarë korr.
Sot po shtohen xhipat qeveritarë, që e kanë naftën e lirë ashtu siç duhet ta kishin traktorët e bujqve të cilët s’po kanë llogari të punojnë tokën. Me qeverisjen e Lëvizjes VETËVENDOSJE! nesër, lirohet nafta për traktorët e bujqve që do ta punojnë tokën dhe hiqen xhipat e shtrenjtë, sepse popullit i duhet dhënë llogari.
