BE e konfirmon takimin në Bruksel, Thaçi: Më me dëshirë do të dialogoja më një dreq, sesa me Aleksander Vuçiqin

Aktuale

BE e konfirmon takimin në Bruksel, Thaçi: Më me dëshirë do të dialogoja më një dreq, sesa me Aleksander Vuçiqin

Më: 7 nëntor 2018 Në ora: 12:48
Thaçi, Mogherini dhe Vuçiq

(E plotësuar) - Të enjten në Bruksel vazhdojnë bisedimet Kosovë-Serbi me ndërmjetësimin e Bashkimit Evropian. Ky është takimi i katërt i fazës finale për arritjen e marrëveshjes mes dy vendeve. Presidenti i Kosovës, Hashim Thaçi në një intervistë e konfirmon takimin dhe shpjegon se çfarë pret nga ky takim.

Si gjithmonë, e quan takim të vështirë, e duke folur për presidentin serb, Aleksander Vuçiq ai thotë se më me dëshirë do të dialogonte më një dreq sesa me të.

Ka bërë thirrje te i gjithë spektri politik në Kosovë për një vetëdije më të lartë shtetërore për një vendimmarrje më të shpejt për përfaqësim politik me bazë më të gjerë politike. Thotë se SHBA-ja dhe BE-ja janë në mbështetje të këtij procesi.

Thaçi është pyetur edhe për vendimin e Qeverisë për masën 10% të importeve nga Serbia, ndërkohë garanton rrugë të sigurt euroatlantike për Kosovën nëse arrihet marrëveshja, pra njohja reciproke.

Thaçi: Marrëveshja nënkupton njohje reciproke

“Një marrëveshje kjo e përgjithshme, që nënkupton njohje reciproke, marrëveshje me obligim ligjor në rrafshin ndërkombëtar. Shpresoj se ky proces do të përmbyllet me marrëveshje e cila nënkupton definitivisht njohjen reciproke dhe mundësinë e anëtarësimit të Kosovës në OKB, që do të hapet mundësia e njohjes së Kosovës nga 5 vendet e BE-së dhe hapja e sigurt e perspektivës evropiane edhe për Kosovën edhe për Serbinë”, thotë ai.

Ai ka bërë thirrje te i gjithë spektri politik për një vendimmarrje më të shpejt për përfaqësim politik me bazë më të gjerë politike.

Thaçi thotë për kp se më me dëshirë do të dialogonte me një dreq sesa me Vuçiqin.

Thaçi: Më me dëshirë do të dialogoja me një dreq se me Vuçiqin

“Pres që do të jetë një takim i vështirë, i rëndë, sepse homolugu im nga Serbia është një bashkëbisedues i vështirë, i komplikuar e ne të njëjtën kohë edhe i ngarkuar. Mund të them se dëshirën më të madhe do të isha uluar me një dreq në tavolinë për të biseduar, sesa më Aleksander Vuçiqin, sepse ai me tërë potencialin e tij, tërë arsenalin shtetëror të Serbisë, po punon për shpërbërjen e e Kosovës si shtet por edhe dëmtimin e institucioneve të Kosovës. Natyrisht që unë do e përballojë, por nuk është e mjaftueshme përballimi i Serbisë, është me rëndësi që i gjithë spektri politik të kyçet në këtë proces, të nxirret sa më shpejt ajo platformë e Kuvendit të Kosovës, të bëhet ekipa e përbashkët e Kosovës, të jemi të gjithë së bashku ën tavolinë dhe të fitojmë këtë proces”, thotë ai.

Presidenti i Kosovës nuk pret që nesër të arrihet një marrëveshje.

Thotë se finalizimin e saj do e mbyll i gjithë spektri politik.

Thaçi: Finalizimin e marrëveshjen do e mbyll i gjithë spektri politik

“Pres një dinamizim të këtij procesi final, por natyrisht se finalizimin do ta mbyllim i gjithë spektri politik dhe gjithë institucionet e Republikës së Kosovës”, thotë ai.

I pyetur për vendimin e Qeverisë së Kosovës, për masë prej 10% për produktet e importuara nga Serbia, ai nuk ka dashur ta komentojë.

Thotë se secili institucion merr vendime dhe merr edhe përgjegjësitë që dalin prej atyre vendimeve.

Thaçi: Nuk komentoj vendim e institucioneve tjera

“Pushtetet janë të ndara në Kosovë, nuk komentoj opinionet e as vendimet e institucioneve tjera. Secili institucion merr vendime merr përgjegjësitë dhe në të njëjtën kohë autoritetin e vet për atë vendimmarrje”, thotë ai për KosovaPress.

Ndërkohë takimi në Bruksel do zhvillohet para atij që do të jetë në Paris, ku të dy presidentët kanë pranuar ftesën e presidentit të Francës, Emanuel Macron me rastin e 100 vjetorin të armëpushimit të parë të luftës së parë botërore.

Thaçi tregon se çfarë pritet të ndodh edhe atje.

Thaçi: Parisi do të jetë një mundësi shtesë

“Parisi do të jetë një mundësi shtesë, ku do të jenë të gjithë liderët botëror aty, për një inkurajim më të fuqishëm ndërkombëtar gjithë botëror, për domosdoshmërinë e arritjen e marrëveshjes paqësore Kosovë-Serbi. Një marrëveshje kjo që do të mirëpritet dhe mbështetet fuqishëm nga gjithë akterët botëror e në veçanti rëndësia e kësaj marrëveshje dhe domosdoshmëria e arritjes së saj, rritet edhe më tepër pas arritjes së marrëveshjes mes Maqedonisë dhe Greqisë për emrin, me gjithë kritikat ndaj saj dhe skepticizëm, por Maqedonia sot po lëviz drejt NATO-s, ne nuk kohë për të humbur, duhet tejkaluar këtë konflikt të ngrirë dhe të lëvizim para me një dinamik dhe trend evropian”, thotë ai.

BE e konfirmon takimin e Thaçit me Vuçiqin në Bruksel

Shefja e politikës së jashtme të Bashkimit Evropian, Federica Mogherini, ka ftuar presidentin e Kosovës, Hashim Thaçi dhe presidentin e Serbisë, Aleksandër Vuçiç, në një takim të ri të enjten më 8 nëntor.

Në një njoftim të zyrës së zonjës Mogherini, thuhet se “në takim pritet që të dy presidentët të konfirmojnë gatishmërinë e tyre për intensifikimin e punës për të arritur një marrëveshje të detyrueshme ligjore për normalizimin gjithëpërfshirës të marrëdhënieve, që është thelbësore për rrugën e tyre evropiane”.

Kosova dhe Serbia janë përfshirë në një proces bisedimesh për normalizimin e marrëdhënieve. Por, ndonëse ishte thënë se vjeshta mund të shënojë një periudhë takimesh të ngjeshura ndërmjet të dyja palëve, takimi i fillimit të shtatorit dështoi dhe deri tash nuk ka pasur asnjë përpjekje tjetër për takim të ri.

Presidenti i Kosovës, Hashim Thaçi dhe ai i Serbisë, Aleksandër Vuçiç, gjatë verës kërkuan mbështetje ndërkombëtare për një marrëveshje normalizimi ndërmjet të dyja vendeve, përfshirë edhe mundësinë e prekjes së kufijve.

Këto ide nxitën reagime të shumta në Kosovë dhe në Serbi, por edhe ndarje në skenën ndërkombëtare, ndërmjet atyre që do ta pranonin një marrëveshje që arrihet mes palëve dhe atyre që druajnë se prekja e kufijve, mund të nxisë lëvizje të ngjashme edhe në pjesët tjera të rajonit, që ende nuk është rimëkëmbur nga luftërat e përgjakshme të fundit të shekullit të kaluar.

Presidenti i Kosovës, Hashim Thaçi, tha javën që lamë pas në Minsk të Bjellorusisë, se janë duke u shqyrtuar të gjitha idetë, por ende nuk ka asnjë marrëveshje. Ai tha se nuk do të ketë kufij përgjatë vijave etnike, nuk do të ketë shkëmbim të popullatës në mes të dy vendeve dhe do të ruhet shpirti shumetnik dhe realiteti i Kosovës dhe Serbisë.

Presidenti Thaçi ka përsëritur për muaj të tërë se angazhohet për korrigjim kufiri që nënkupton bashkimin e luginës së Preshevës, një rajon me shumicë shqiptarë në jug të Serbisë, me Kosovën.

Presidenti i Serbisë, Aleksandër Vuçiç, theksoi javën e kaluar se ideja e tij për vënien e kufirit ndërmjet serbëve dhe shqiptarëve, nuk është pritur mirë në Serbi dhe se për këtë arsye nuk ka dhënë hollësi rreth kësaj ideje duke e ditur reagimin e opinionit serb. Kufizimi ndërmjet dy popujve nënkupton ndarjen tokësore të Kosovës, përkatësisht që veriu i saj me shumicë serbe t'i bashkohet Serbisë.

Të dy presidentët do të marrin pjesë në manifestimet me rastin e përvjetorit të përfundimit të Luftës së Parë Botërore, të dielën në Paris. Presidenti Thaçi e ka hedhur poshtë çdo mundësi që të bisedohet atje, ndërsa presidenti serb, Vuçiç, ka thënë se mund të ketë një takim me praninë e zyrtarëve të lartë perëndimorë, por nuk pritet të ketë asgjë me peshë në Francë.

commentFirst article
Sot mund të lexoni Shfletoni kopertinat