Haradinaj: Prioritet yni, avancimi drejt Bashkimit Evropian

Aktuale

Haradinaj: Prioritet yni, avancimi drejt Bashkimit Evropian

Më: 8 nëntor 2018 Në ora: 13:12
Kryeministri i Republikës së Kosovës, Ramush Haradinaj

Kryeministri i Republikës së Kosovës, Ramush Haradinaj ka mbajtur takimin e rregullt të Këshillit Ministror për Integrim Evropian.

“Nëse Kosova ngec në reformat drejt BE-së, atëherë ka ngecur zhvillimi ynë shoqëror në tërësi”, kështu tha kryeministri i Republikës së Kosovës, Ramush Haradinaj në takimin e rregullt të Këshillit Ministror për Integrim Evropian.

Kryeministri Haradinaj, tha se sot janë mbledhur për të diskutuar zbatimin e agjendës ERA, pasi që janë në përmbyllje të periudhës kohore të ERA 1 dhe rifillimin e ERA 2, që nënkupton prioritet e nxjerra për zbatim në një periudhë kohore para tyre.

Kryeministri Haradinaj tha se pritet që pas përmbylljes së këtij viti, në Kosovë të qëndrojë komisioneri Hahn, që do të ishte një mundësi e mirë për të vazhduar më tutje me obligimet e marra Kosovë-BE.

“Përkundër faktit që ka ekzistuar një fokusim në agjendën e reformës evropiane, prapë se prapë mund të konstatojmë se ka pasur disa ngecje dhe vonesa në zbatim, të ndërlidhura edhe me mënyrën e marrjes së vendimeve ose me mënyrën e nxjerrjes në prioritet të këtyre temave”, tha kryeministri Haradinaj, duke shtuar se megjithëkëtë janë në rrethana kur mund të përmbyllet ERA 1 dhe fillimin e prioriteteve të tjera, transmeton lajmi.net.

Kryeministri Haradinaj theksoi se pa marrë parasysh temat, me të cilat preokupohet ndoshta çdo institucion apo sektor i caktuar, prapë se prapë, nuk duhet harruar që tema bazë apo themeli i asaj se kush jemi si vend, është vet avancimi ynë drejt Bashkimit Evropian.

“Nëse Kosova ngec në reformat drejt BE-së, atëherë ka ngecur zhvillimi ynë shoqëror në tërësi”, tha kryeministri Haradinaj, duke shtuar se nga ky tregues vërtetohet se sa qytetarët, shoqëria, vendi ynë, po i afrohet BE-së.

Ndërkaq, ministrja e Integrimit Evropian, Dhurata Hoxha, tha se me qëllim të prioritizimit të reformave, Qeveria e Republikës së Kosovës dhe Bashkimi Evropian, kanë lansuar agjendën e reformave evropiane, ku ERA 1 parashihte zbatimin e 22 prioriteteve nga një varg institucionesh.

Ministrja tha se sa i përket të gjeturave të raportit përfundimtar, është bërë punë e mirë, por mundet edhe më shumë, duke cekur se edhe pse disa masa që janë ndërmarrë si Qeveri, kanë ngecur në Kuvend me mosmiratimin e nismave legjislative.

Pas takimit, kryeministri Haradinaj dhe ministrja Hoxha, në një konferencë të përbashkët për media, konfirmuan se, nga ky takim u miratua në parim raporti ERA 1 dhe lista e prioriteteve të dokumentit të ERA 2.

Kryeministri Haradinaj tha se është bërë punë e mirë deri këto, por që pret edhe më shumë angazhim nga të gjithë akterët e përfshirë.

“Me dinamikat e punës të Këshillit Ministror për zbatimin e prioriteteve të ERA-s, do ta dërgojmë një porosi të mirë që Kosova është kandidat serioz, potencial për një të ardhme të afërt për statusin e kandidatit për anëtarësim në BE”, tha kryeministri Haradinaj. /Lajmi.net/

commentFirst article
Sot mund të lexoni Shfletoni kopertinat