(E plotësuar) - Lidhja Demokratike e Kosovës është duke punuar që bashkë edhe me partitë tjera në opozitë ta rrëzojnë Qeverinë.
Kështu tha kryetari i kësaj partie Isa Mustafa pas mbledhjes së Këshillit të Përgjithshëm që u mbajt sot pasdite.
Për rrëzimin e qeverisë, Mustafa tha se po bashkëpunojnë më Vetëvendosjen dhe PSD-në, por shtoi se po mundohen të bashkëpunojnë edhe me partitë në pozitë. Njëherësh ai njoftoi se po përgatiten për zgjedhje.
Mustafa: Po bashkëpunojmë me VV-në dhe PSD për ta rrëzuar Qeverinë
“S’mund të flas për një rrugë të sigurt sot, por mund të flas për një qëndrim konsistent dhe të palodhshëm që ne kemi për ta rrëzuar Qeverinë, do të thotë ne po bashkëpunojmë me Vetëvendosjen, do të bashkëpunojmë sa të mundemi edhe me Partinë Social-Demokrate”, ka thënë Mustafa.
Mustafa tha se Qeveria po merr vendime skandaloze e jo kushtetuese, e po ashtu qeverinë e fajësoi për mosliberalizimin e vizave.
Sipas Mustafës, papunësia dhe varfëria në Kosovë janë si pasojë e qeverisjes aktuale. Ai po ashtu tha se Kosova nuk mund ta luftojë krimin e korrupsionin, përderisa, sipas tij, çdo i treti ministër ka probleme me ligjin.
Mustafa: Ministrat e kësaj Qeverie kanë problem me ligjin
“U tha se një Qeveri e tillë në të cilën çdo i treti ministër është me aktakuzë, me mbi 70 zëvendësministra, me pozita të shpikura të koordinatorëve nacional në fusha të ndryshme nuk siguron që Kosova e ka seriozisht të luftojë krimin dhe korrupsionin dhe ta respektojë shtetin ligjor, sepse ata që janë për shtet ligjor natyrisht qeverisin me njerëz që nuk kanë problem me ligjin”, ka thënë Mustafa.
Në lidhje me dialogun, Mustafa tha se Qeveria dhe kryeministri e kanë bartur procesin e dialogimit te presidenti pa mandat të Kuvendit, e këta të fundit i fajësoi për mos funksionim të Kuvendit, si dhe veprimet në lidhje më çështjen e shkëmbimit të territoreve, që ai i quajti të dëmshme për Kosovën. Sipas tij, ato veprime kanë ndikuar në heqjen e njohjeve për shtetin e Kosovës.
Mustafa: E përkrahim dialogun nëse ka njohje reciproke
“Ne si LDK e përkrahim dialogun për njohje reciproke dhe dialogun që zhvillohet shtet më shtet, jo Prishtinë-Beograd, por Kosovë-Serbi, ky është kriteri jonë dhe ne kërkojmë që nga dialogu të rezultojnë njohja e pavarësisë së Kosovës, pastaj hapja e mundësive ose garanca politike e misioneve ndërkombëtare që Kosova të anëtarësohet në OKB, pastaj t’i hapet dera që të anëtarësohet në BE dhe në paktin e Atlantikut”, ka thënë Mustafa.
Lidhur me vendimin e Qeverisë për rritjen e taksës 100 përqind për prodhimet serbe, Mustafa tha se nuk e kanë diskutuar këtë çështje me Këshillin e LDK-së, por nga pikëpamja personale, masën për taksës 100 përqind e quajti vendim popullist dhe tha se është marrë në baza emocionale. Pavarësisht kësaj, Mustafa tha se Serbia e ka merituar një masë të tillë.
Mustafa: Rritja e taksës është bërë në bazë të emocioneve
“Qeveria duhet të japë informata se si e ka llogaritur që t’i përballojë këto konsekuenca, të themi te bizneset, te qytetarët, te rritja e çmimeve, te problemet e importimit, pastaj produkteve përmes territorit të Serbisë dhe çështjeve tjera, sepse nëse i dëgjojmë deklaratat e njerëzve që mbrojnë dhe përfaqësojnë qëndrimet e qeverisë, ato thonë se vendimi është marrë pasi që është matur mirë dhe është analizuar mirë, por pastaj dalim e i dëgjojmë disa infromata se vendimi është marrë duke bërë Pazar, dikush ka thënë poi a rrisim 30 përqind, tjetri ka thënë jo 40, tjetri ka thënë jo rritja 100 përqind se ata e meritojnë, edhe del që nuk është bërë rritja në bazë të një analize të mirë, por është bërë në bazë të emocioneve”, ka thënë Mustafa.
Për këto çështje të cilat janë diskutuar në Këshillin e Përgjithshëm të LDK-së, Mustafa ka thënë se janë çështje që ata po i preokupojnë si parti.
Mustafa: Serbia meritoi taksën nga Kosova, por dikush bëri pazare me vendimin
Pas mbledhjes së Këshillit të Përgjithshëm të LDK-së, kreu i kësaj partie Isa Mustafa tha se një ndër temat specifike që diskutuan ishte përgatitja për zgjedhje qendrore.
I pyetur nëse kanë ndonjë mënyrë të sigurt për ta rrëzuar qeverinë, Mustafa tha se po bashkëpunojnë më Vetëvendosjen dhe PSD-në.
Ai tha se do ta rrëzonin qeverinë që sot nëse do t'i kishin votat.
E lidhur me dialogun, Mustafa tha se e përkrahin vetëm nëse ka njohje reciproke.
Ai foli edhe për vendimin e taksës 100 përqind, për të cilën tha se është veprim i pamenduar mirë. Megjithatë, ai tha se Serbia e meriton një gjë të tillë.
***
Pas mbledhjes së Këshillit të Përgjithshëm të LDK’së, kryetari i kësaj partie Isa Mustafa ka thënë se vendimi për taksën është vendim popullist, duke shtuar se me të dikush ka bërë pazare.
Ndërkaq, duke folur për Serbinë, ai ka thënë se ata e kanë merituar këtë vendim.
“Sa i përket Serbisë ata e kanë merituar këtë vendim, por konsiderojmë që këto vendime duhet të jenë të menduara dhe të matura mirë, në mënyrë që të mos konstatohet më vonë që Kosova ka bërë vendim të ngutshëm”, shtoi i pari i LDK’së.
Gjithashtu, Mustafa ka përmendur edhe rritjen e çmimeve.
“Mendoj që qeveria duhet të japë informata se si ka llogaritë të përballojë këto konsekuenca te rritja e çmimeve’’ shtoi ai.
Por, sipas LDK’së vendimi për taksën është bërë në formë të pazarit me propozime të ndryshme.
“Vendimi është bërë duke bërë pazare, dikush ka thënë rriteni 30 përqind dikush 100 për qind se ata e meritojnë”, tha ai.
Në fund, duke folur për fushatën e Serbisë për mos anëtarësim të Kosovës në organizata ndërkombëtare, Mustafa ka shtuar se ata e meritojnë çdo vendim të tillë të Kosovës.
