“Burrin ma vranë para syve" Historia therëse e gruas dhe vajzës që s'njohu kurrë babain - Bota Sot
“Burrin ma vranë para syve" Historia therëse e gruas dhe vajzës që s'njohu kurrë babain

Shqipëria

“Burrin ma vranë para syve" Historia therëse e gruas dhe vajzës që s'njohu kurrë babain

Më: 28 nëntor 2018 Në ora: 13:26

“Isha prapa tim shoqi në momentin kur e vranë për hakmarrje, e pashë me sytë e mi kur e qëlluan me armë në qafë”.

Janë këto disa nga fjalët që thotë një nënë shqiptare, e cila bën burrin dhe gruan në shtëpinë e saj me tre fëmijë. Historia e Dilore Gjinit është e dhimbshme, e mbushur me sakrifica dhe me shumë lot.

Emisioni “Shqiptarët për Shqiptarët” shkoi pranë shtëpisë së Dilores në fshatin Kashnjet të Lezhës. Atje i pret Dilorja dhe i fut në shtëpinë e saj të sakatuar nga vitet. 

Image
Image
Image
Image

Dilorja: Kalova vështirësi shumë të madhe, nuk mu ndanë hallet asnjëherë. Cfarë do të bëja për fëmijët, s'kisha asnjë të ardhur. Shihja ndonjë komshi dhe i thoja a ke punë. Kam punuar me lopatë. Shumë e vështirë të rrisësh fëmijë jetimë pasi ata nuk kënaqen kollaj. Vetëm shpirti im e di se sa kam vuajtur. S’kisha kujt me ju shpreh se askush s’më ndihmonte.

Pjesa më e dhimbshme e kësaj historie vjen në momentin kur dëgjon Majlindën. 18 vjeçarja lindi pak muaj pas vrasjes së të atit dhe tregon momentin kur mësoi për vdekjen e tij. 

Dilorja e kishte thënë prej vitesh se babai i saj punonte jashtë shtetit për familjen dhe se një ditë do të vinte në shtëpi.

Image

Majlinda: Mami më kish thënë që punonte jashtë shtetit... prisja me padurim ta takoja. Kur kam qenë 10 vjeçe kam qenë në shkollë. Mësuesit kërkuan babin dhe unë u mërzita shumë që nuk e kisha atë. E prita e prita por nuk erdhi. Mami më pas më tha që nuk e ke babin.

Babi më ka dashur shumë. Emrin ai ma ka vënë dhe jam krenarë për këtë gjë. Një dëshirë kam patur, që të kisha një fotografi me të dhe ta përqafoja shumë.

Image
Image
Image

Dilorja vetë e kujton me buzëqeshje dhe sy të çelur burrin e saj. Thotë se pavarësisht se u martua me shkuesi me të, e donte thellësisht. Ajo tregon se i shoqi kishte një zemër të mirë dhe kurrë nuk kishte patur probleme me të.

Dilorja: Jam martu me shkuesi në moshën 19 vjeçe, më ra gjaku me ta dhe e ndjeva se do kaloja jetë me të... e doja me gjithë shpirt. Kalova një jetë të mirë me të, s’pata asnjë problem veçse mirësi prej tij. Kur mori vesh që kisha djalë i qerasi të gjithë shokët e kur linda djalin më tha dua shumë djem. Ai më tha ti je zemra ime dhe nuk e harroj kurrë këtë gjë. Më thoshte që kemi tokën dhe do të punojmë e plakemi bashkë. Kur ai vdiq nuk më shkoi ndërmend të martohesha sërish. Do jem besnike deri në fund ndaj atij.

Image
Image

Emisioni "Shqiptarët për Shqiptarët" vendosi që ta ndihmojë Diloren. Fillimisht Elvis Naçi e Sidrit Bejleri e dërguan familjen e Dilores në një shtëpi, në mënyrë që banesa e saj të mund t’i nënshtrohej një rikonstruksioni e rimobilimi të plotë.

Dhe pas disa kohësh vjen momenti kur Dilorja merr çelësat e shtëpisë së saj të rinovuar.

Kur hyn brenda dhe sheh se gjithçka është e re, ajo nuk përlotet. Ruan një krenari burrneshe e cila e ka mbajtur në këmbë gjithë këto vite, ku i është dashur të përballet me jetën pa ndihmën e askujt.

Por pavarësisht se ajo qëndron e fortë, sërish fjalët janë të ëmbla.

Kësisoj, ajo kish vendosur me kohë që ta falte gjakun e të shoqit, një vendim i marrë nga ajo dhe familja e bashkëshortit.: Surprizë më të madhe s’kisha parë ndonjëherë në jetën time. Ju ruajt Zoti. Ju falënderoj me gjithë shpirt. Këtë nuk e kisha pritur kurrë. Isha në një gjendje të rëndë. Më duket sikur kam ardhur në një shtëpi të huaj. Mu ngroh shpirti për fëmijët. Nuk e prisja kaq shumë.

Me tu ulur në shtëpinë e re, Dilorja tregon dhe për faktin se hakmarrja e të shoqit, për të ka qenë një çështje që kurrë nuk duhej të kishte ndodhur. Ajo thotë se e ka një djalë dhe se nuk do të dëshironte kurrë që ai të merrte armë për të marrë gjakun e të atit. 

Dilorja: Unë nuk ja kam këshilluar kurrë fëmijëve për t’u hakmarrë. Më mirë sepse Zoti do të na ndihmojë. Ne e kemi falur gjakun, njerëzit e burrit e kanë falur gjakun. Unë duhet të kujdesem për tim bir.

Elvis Naçi i thotë se kjo është dhe arsyeja madhore se përse shqiptarët vendosin ta ndihmojnë Diloren, e cila jo vetëm fali gjakun por luftoi deri në fund për familjen e saj.

Naçi: Lum si ata që e falin gjakun. Shqiptari nuk e vret shqiptarin. Ne kush fal gjak shqiptari e ndihmojmë dhe e nderojmë. Më lejo të të përqafoj e shpreso që të kesh vetëm lumturi në këtë jetë. Ajo që ti ke bo, shpresojmë që gjithë shqiptarët ta marrin si shembull. Nuk ka gjë më të trishtueshme kur dëgjon për hakmarrjen. 

Image
Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...