Ministri i Punëve të Jashtme të Kosovës, Behgjet Pacolli, bëri homazhe në Vlorë.
Zëvendëskryeministri dhe ministri i Punëve të Jashtme i Kosovës, Behgjet Pacolli, gjatë qëndrimit të tij në Vlorë, bashkë me udhëheqësit e Institucioneve të shtetit shqiptar ka nderuar themeluesin e shtetit Ismail Qemali.
“28 Nëntorin, Ditën Tonë Kombëtare po e festoj në Vlorë bashkë me, presidentin Meta, kryeministrin Rama dhe kryeparlamentarin Ruçi. Emocione në nderimin e themeluesit të shtetit Ismail Qemali. Prej Vlorës ju uroj gjithë shqiptarëve Gëzuar Festën e Flamurit! Mbarësi, me suksese e qofshim gjithmonë bashkë!”, ka thënë kryediplomati kosovar, shkruan lajmi.net.
Në këto momente, numri dy i Qeverisë po ndjek ceremoninë zyrtare të nderimit të tij me titullin akademik, “Doctor Honoris Causa” nga Universiteti “Ismail Qemali”.
Titulli i jepet si vlerësim i kontributit të tij me propozime dhe veprime në favor të forcimit të bashkëpunimit ekonomik ndërshqiptar, kontribut ky, që nxit mendimin shkencor kombëtar.
