Partia e Mimoza Kusarit, Alternativa, ka reaguar lidhur me lajmin se është arritur marrëveshja që Alternativa të jetë pjesë e ekipit negociator qeverisës.
Alternativa sipas një kumtese thekson se lajmi është i pavërtetë dhe nuk qëndron.
Sipas tyre, dialogun e mbështesin vetëm nëse tema e kufinjëve nuk është për diskutim dhe nëse Presidenti nuk e udhëheq dialogun.
Ja reagimi i plotë:
Lajmi i publikuar ne media se është arritur marrëveshja që Alternativa të jetë pjesë e ekipt negociator qeverisës dhe se ky është fillimi i një bashkëpunimi për listë të përbashkët në mes të PSD dhe AAK për zgjedhjet e ardhëshme është i pavërtetë dhe nuk qëndron.
Alternativa i ka prezantuar kriteret për mbështetje të ekipit negociator dhe asnjëherë listën e përbashkët me PSD dhe AAK.
Me PSD kemi bashkëpunim parlamentar dhe strategjikisht po e diskutojmë bashkëpunimin, por në asnjë formë dhe në asnjë mënyrë me listë të përbashkët me AAK.
Ne besojmë se dialogu është procesi i vetëm për arritjen e stabilitetit në Ballkan, por jo në mënyren e deritashme dhe me formën e deritanishme.
Dialogun e mbështesim vetëm nëse tema e kufinjëve nuk është për diskutim dhe nëse Presidenti nuk e udhëheq dialogun.
Marrëveshje për mbështetje të ekipit qeveritar nuk ka pa u sqaruar temat e lartëshënuara dhe pa u arritur koncenzusi për mbështetje parlamentare të procesit.