Kryetari i Kuvendit, Kadri Veseli ka dërguar një porosi për Bashkimin Evropian, pas vendimeve që shteti i Kosovës ka marrë kohëve të fundit.
Në një postim në Twitter, ai ka thënë se presin një qasje të sinqertë nga ana e BE-së.
“Pas miratimit të marrëveshjes për demarkacionin, reformave në drejtësi dhe përmbushjes së të gjitha kritereve për liberalizimin e vizave, më shumë se çdo vend tjetër jo anëtar, ne presim një bashkëpunim më të afërt dhe të sinqertë nga ana e BE-së”, ka shkruar Veseli, përcjell lajmi.net.
Në këtë postim, ndërkaq, ai ka vlerësuar mbështetjen e Shteteve të Bashkuara të Amerikës.
Kryeparlamentari gjithashtu ka theksuar se miratimi i rezolutës për dialogun dhe ekipit negociator tregon përkushtimin e Kosovës për marrëveshje dhe gatishmërinë për vendime të mëdha.
