Në mbledhjen e sotme, Qeveria e Kosovës ka diskutuar për draft-marrëveshjen gjithëpërfshirëse dhe obligative ligjore në mes të Kosovës dhe Serbisë, ku mes tjerash u tha se pala serbe që nga fillimi i dialogut nuk kanë qenë e gatshme të zbatojë marrëveshjet e arritura në Bruksel.
Shefi i kabinetit të kryeministrit, Avni Arifi tha se Qeveria e Kosovës ka zbatuar të gjitha marrëveshjet e Brukselit, por pala serbe nuk ka bërë një gjë të tillë. Arifi tha se që nga marsi ka pasur “vdekje klinike” të dialogut.
Ai ka paraqitur draft-marrëveshjen, duke treguar kështu se me këtë dokument parashihet që Serbia të njohë sovranitetin e Kosovës.
Arifi: Të ketë drejtësi për krimet e luftës
“Objektivat kryesore të draft-marrëveshjes janë: Që palët të njohin sovranitetin shtetëror dhe integritetin territorial të njëra-tjetrës. Të adresohen çështjet që ndërlidhen me suksesionin nga shpërbërja e Jugosllavisë, si për shembull pensionet dhe borxhet e jashtme. Të ketë drejtësi për krimet e luftës, angazhim për zbardhjen e personave të zhdukur, njohjen e viktimave të dhunë seksuale dhe reperacionet, të zgjidhen problemet me të cilat ballafaqohemi sot si njohja reciproke, energjia, telekomunikimi, transporti. Të mundësohet lëvizja e lirë e njerëzve, mallrave, shërbimeve dhe kapitalit në harmoni të plotë me vlerat e Bashkimit Evropian”, tha Arifi.
Ai po ashtu tha se në këtë draft-marrëveshje përfshihet edhe anëtarësimi i Kosovës në organizata ndërkombëtare.
Ndërsa, kryeministri Ramush Haradinaj ka përsëritur edhe një herë se taksa ndaj mallrave serbe nuk do të hiqet deri në njohjen e vendit tonë nga ana e Serbisë.
Haradinaj: Serbia ka nevojë për tregun tonë
“Tarifa që është vendos 100 për qind ndaj mallrave të Republikës së Serbisë do të qëndroj deri në arritjen e njohjes nga Serbia. Pra, ne kemi nevojë për njohjen nga Serbia, po ashtu ata kanë nevojë për tregun tonë”, tha Haradinaj.
Duke folur rreth draft-marrëveshjes, ministri i Administratës Publike, Mahir Yagcilar, tha se si përfaqësues i komunitetit turk do të vazhdojnë të përkrahin interesat e shtetit të Kosovës.
Yagcilar: Ne përkrahim interesat e shtetit të Kosovës
“Edhe unë bashkë me deputetët e subjektit tim politikë e kam përkrah dhe në të ardhmen do të vazhdoj ta përkrah çdo zhvillim në dobi të Republikës së Kosovës. Në këtë aspekt edhe propozimi i marrëveshjes gjithëpërfshirës në mes Kosovës dhe Serbisë është një hap drejt fuqizimit të shtetit dhe rregullimit të marrëdhënieve normale dhe miqësore me Serbinë. Në parim e përkrah dokumentin e propozuar dhe do të jem pjesë aktive e plotësimit dhe zbatimit”, ka thënë Yagcilar.
Sa i përket mallrave që kanë hyrë në Kosovë, para vendosjes së masës 100 për qind, ministri i Ekonomisë Bedri Hamza ka thënë se duhet të shikohen interesat e bizneseve kosovare, në mënyrë që ato mos të dëmtohen me këtë masë të vendosur.
Ndërsa, sa i përket propozim-vendimit për themelimin e komitetit ndër-ministror për integrim në NATO, zëvendëskryeministri Enver Hoxhaj ka kërkuar të ketë një korrigjim në këtë propozim-vendim.
Hoxhaj: Emri më i saktë është anëtarësim në NATO, e jo integrim
“Emri më i saktë do të ishte anëtarësim në NATO, meqë nuk përdoret fjala integrim në NATO, ne themi integrime euroatlantike, por ideja është për anëtarësim në NATO. Mund ta keni menduar si fazë paraprake të bashkëpunimit me NATO, por terminologjia që përdoret është integrim në NATO, të anëtarësohet në NATO. Por, nuk po insistoj ta ndryshoni ju, sepse e keni pas një arsye të fortë. Nuk synoj që ta modifikoj”, ka thënë Hoxhaj.
Kabineti qeveritar ka aprovuar këtë propozim-vendim. Në mbledhjen e sotme këta të fundit kanë aprovuar edhe projekt-rregulloren për shërbimin e komunikimit qeveritar me publikun. Po ashtu edhe propozim-vendimin përfundimtar për shpronësim të pronave të paluajtshme, të cilat preken nga ndërtimi i qarkores së Gjakovës, zgjerimi i rrugës Gjakovë-Prizren.
