Në vitet e fundit në Kosovë ndodhin dukuri të shëmtuara, ku në disa rajone po shkatërrohen pyjet e bukura!
Federata Bjeshkatare Alpiniste e Kosovës kundërshton dëmtimin dhe shkatërrimin e mjediseve të mbrojtura!
"Kohëve të fundit jemi dëshmitarë të dëshirës dhe vullnetit të mirë të disa entuziastëve që të bëjnë sa më shumë për zhvillimin e aktiviteteve alpiniste, sigurimin dhe tërheqjen e turistëve. Mirëpo ndodh që ndërmarrja e këtyre aktiviteteve vullnetare të jetë në kundërshtim me rregullat dhe ligjet në fuqi e sidomos kur ato kryhen në mjediset e mbrojtura me ligj. Rasti i fundit është tentimi për ngritjen e sigurisë së vizitorëve që duan të shijojnë bukuritë e ujëvarës së Mirushës.
Federata Bjeshkatare Alpiniste e Kosovës, kundërshton çfarëdo punimi në infrastrukturën bjeshkatare, në parqet nacionale dhe në vendet e mbrojtura me ligj, si - shenjëzim, shtigje, ngritje të shtigjeve të siguruara me litar çeliku (via ferrata) etj. - pa marrjen e pëlqimit paraprak nga organet kompetente, si dhe fton të gjithë të interesuarit që punimet eventuale, të kryhen në koordinim me FBAK-un dhe komisionet profesionale që veprojnë në kuadër të Federatës.
Vendosja e infrastrukturës (kudo në natyrë dhe në bjeshkë), duhet të bazohet në parimin: “aq sa është e domosdoshme, por sa më pak që është e mundur”. Ndërsa vendosja e shenjave të përhershme, me material të fortë, në maja, nuk preferohet (e konsiderojmë ndotje optike e mjedisit).
Përndryshe, Federata Bjeshkatare Alpiniste e Kosovës ofron mbështetje profesionale për të gjithë dhe pa përjashtim, lidhur me standardet dhe infrastrukturën bjeshkatare dhe alpiniste:
1. Shtigjet bjeshkatare
2. Sinjalistika vertikale dhe horizontale
3. Shtigjet e siguruar me litarë çeliku (via ferrata)
4. Vijat ngjitëse
5. Ulëset dhe bankat
Mbrojtja dhe ruajtja e natyrës është qëllimi ultimativ i komunitetit bjeshkatar!", reagon Federata Bjeshkatare Alpiniste e Kosovës.