Këshilltari i Shtëpisë së Bardhë dhe dhëndri i presidentit Donald Trump, Jared Kushner, tha të martën se hetimi i posaçëm i Robert Mueller për rolin e Rusisë në zgjedhjet e vitit 2016, e dëmtoi demokracinë amerikane më shumë sesa ndërhyrja e Moskës.
“Unë mendoj se hetimet dhe të gjitha spekulimet që kanë ndodhur për dy vitet e fundit, kanë pasur një ndikim shumë më të ashpër në demokracinë tonë, sesa disa reklama të Facebook, të cilat pretendohet se janë blerë nga Rusia”, tha Kushner në një forum të revistës “Time”, në Nju Jork.
Mueller, në një raport të publikuar javën e kaluar, konstatoi se Rusia ndërhyri në zgjedhjet presidenciale të vitit 2016 “në mënyrë gjithëpërfshirëse dhe sistematike”, duke favorizuar Trumpin kundër rivalit demokrat Hillary Clinton.
Rusët blenë reklama në Facebook, por raporti gjithashtu përshkruante edhe taktika të tjera të tilla si piratimi dhe rrjedhja e emaileve të Partisë Demokratike dhe përfshirja në fushatën Trump, duke përfshirë një takim me Kushner dhe zyrtarë të tjerë të fushatës.
Demokratët në Kongres po debatojnë nëse do të fillojnë procedimet e pezullimit kundër Trump, për pengimin e mundshëm të drejtësisë.
Presidenti dhe liderët në Partinë Republikane thonë se raporti e rifuqizoi Trump. Mueller përvijoi raste të shumta ku Trump u përpoq të pengonte hetimin. Këshilli i posaçëm nuk arriti në përfundimin se Trump kishte kryer një krim, por as nuk e liroi presidentin nga akuzat. Mueller gjithashtu nuk arriti në përfundimin se kishte një komplot midis fushatës së Trump dhe Rusisë.
“Intervistë e madhe nga Jared. Është e këndshme që të kemi njerëz jashtëzakonisht të mençur, që shërbejnë në vendin tonë”, tha Trump në Twitter duke postuar videon e intervistës së dhëndrit të tij.
Kushner tha se fushata e Trump nuk ishte në dijeni të fushëveprimit të përpjekjeve të Rusisë, duke thënë, “nocioni i asaj që ata po bënin, as nuk na regjistroi si ndikues”.
Raporti detajoi shumë kontakte ruse me fushatën Trump, shumë prej të cilëve u raportuan nga media gjatë dy viteve të fundit.
“Kur erdhi nocioni i rrëfimit të marrëveshjes ruse, unë isha personi i parë që thashë se jam i lumtur të marr pjesë me ndonjë hetim. Mendova se e gjithë kjo ishte një lloj absurditeti, të jesh i sinqertë me ty”, tha Kushner, i cili u intervistua nga hetuesit e Muellerit.
