Ministrat e Financave të G7-s u zotuan të ndalojnë pagesat e borxhit të vendeve më të varfra, të paktën deri në fund të vitit, në përputhje me një vendim të hershëm të G20-s, njoftuan ata sot në një konference virtuale.
“Ne jemi të përkushtuar për zbatimin e nismës për pezullimin e shërbimit të borxhit, e miratuar nga G20 dhe Paris Club”, thanë ministrat.
“Kjo do të bëhet duke pezulluar pagesat zyrtare të borxhit dypalësh të vendeve më të varfra deri në fund të vitit 2020 dhe mbase edhe më gjatë, duke u ofruar këtyre vendeve hapësirë fiskale për të financuar sociale, shëndetësore dhe masa të tjera për të trajtuar pandeminë, shtuan ata.
Ministrat e Financave dhe bankierët qendrorë të grupit G20 aprovuan më 15 prill një pezullim të përkohshëm të shërbimit të borxhit për vendet më të varfra.
Ata ranë dakord për një qasje të koordinuar, me një axhendë të përbashkët, duke siguruar karakteristikat kryesore të kësaj nisme, të miratuar gjithashtu edhe nga Paris Club.
