Çfarë po ndodh në Brazil me këtë shpejtësi marramendëse? - Bota Sot
Çfarë po ndodh në Brazil me këtë shpejtësi marramendëse?

Amerika

Çfarë po ndodh në Brazil me këtë shpejtësi marramendëse?

Më: 21 qershor 2020 Në ora: 07:49
Ilustrim

Pandemia e koronavirusit duket sikur po i jep një “armëpushim” Evropës, dhe tashmë ka zgjedhur fushëbeteja në kontinente të tjerë.

Njëri prej tyre është Amerika e Jugut dhe veçanërisht Brazili. Sipas përllogaritjeve të John Hopkins University, vendi ka kaluar tashmë një milion të infektuarit nga koronavirusi dhe mund të shndërrohet, në disa javë, në vendin më të goditur në botë nga pandemia, duke kaluar në shtrirjen e infeksionit por edhe në viktimat Shtetet e Bashkuara të Amerikës.

Dje vendi ka përjetuar një bilanc dramatik, me më shumë se 55 mijë raste të reja, pjesërisht rezultat i disa përllogaritjeve të gabuara në ditët e kaluara. Sipas autoriteteve mjekësore braziliane, numri efektiv mund të jetë deri në 10 herë më i madh, dhe jo më i ulët se 3 milionë të infektuar.

Me gati 1 mijë të vdekur në ditë, Brazili ka humbur deri tani 50 mijë njerëz të infektuar nga koronavirusi. Sipas projeksionit të Universitetit Mjekësor të Uashingtonit, Brazili do të kalojë bilancin e viktimave amerikane në fund të muajit korrik.

Në pjesët veriore të vendit virusi duket sikur ka ulur virulencën e tij. Kurse pjesa jugore, më e populluar dhe e varfër, mbetet në emergjencë të plotë.

Si paradoks, qytetet e mëdha si Rio de Janeiro po çlirojnë çdo ditë e më shumë masat shtrënguese, duke hapur restorante, qendra tregtare dhe ambiente të përbashkëta.

Polemika të mëdha ndërkohë vijnë nga menaxhimi i situatës nga presidenti Bolsonaro. Fillimisht skeptik për virulencën e koronavirusit, të cilësuar si “një grip i vogël“, presidenti me javë të tëra ka nënvlerësuar masat duke deklaruar madje teori origjinale si ajo që “brazilianët duhen studiuar, nuk na ndodh gjë nga viruset. Mund të shihen njerëz që hidhen në ujërat e zeza dhe asgjë nuk i ndodh”.

Nga ana tjetër Ministria e Shëndetësisë braziliane, në një kohë kur edhe FDA amerikane ka hequr lejen për trajtimin e COVID-19 me hidroksiklorikinë, e ka shtrirë përdorimin e tij edhe te gratë shtatzëna dhe fëmijët. Një menaxhim i kritikueshëm, ku opinioni i shumë ekspertëve lokalë është mënjanuar, dhe që rrezikon të përkeqësojë situatën.

Shfaq komentet
comments powered by Disqus
Sot mund të lexoni Shfletoni kopertinat