Biologët nga New Mexico lëshuan alarmin pasi mijëra zogj të ngordhur u gjetën në ditët e fundit.
Profesoresha e Universitetit Shtetëror të New Mexico, Martha Desmond, tha për mediat lokale se arsyeja e vdekjes masive ishte një mister, por që mund të kishte lidhje me tymin e zjarrit ose motin e ftohtë.
“Numri i zogjve të ngordhur tani mund të jetë në miliona”, tha ajo.
Shkencëtarët kanë raportuar se popullatat e zogjve të Amerikës së Veriut kanë rënë masivisht në vitet e fundit.
Biologët shtetërorë u kanë kërkuar njerëzve që t’i raportojnë nëse vërejnë zogj të ngordhur për kërkime të mëtejshme.
Sipas dëshmitarëve, disa zogj, përfshirë zogjtë shtegtarë, dallëndyshet dhe zogjtë blu, u sollën çuditshëm para se të vdisnin.
“Është shkatërruese. Unë nuk mendoj se kam parë ndonjëherë diçka kaq të tmerrshme në jetën time”, tha Desmond për KRQE-TV.
Shtetet fqinje jugperëndimore të tilla si Colorado, Arizona dhe Teksas gjithashtu raportuan një rritje të numrit të ngordhjes së shpendëve.
Tymi nga zjarret në pyje mendohet se ka kapur mushkëritë e zogjve ose i ka detyruar ata të ndryshojnë rrugët e migrimit.
Mund të jetë faji edhe te reshjet e fundit të borës në Kolorado, tha Desmond, duke shtuar se ata nuk do të dinë më shumë derisa të studiojnë kufomat e kafshëve.
Ndërkohë, Shërbimi Pyjor i SHBA-së në Pyllin Kombëtar Santa Fe ka apeluar për ndihmë publike.
“Ngordhja e pashpjegueshme e zogjve shqetëson shumë biologët e botës së egër”, tha Shërbimi Pyjor dhe u kërkoi njerëzve të mbledhin të dhëna për zogjtë që gjejnë.
