Enrique Roman-Martinez kishte dalë për kamping me disa shokë të tij ushtarë. Një autopsi zbuloi se “disa goditje të forta prerjeje i kishin këputur kokën”.
Tmerri që rrethon zhdukjen e ushtarakut 21 vjeçar amerikan Enrique Roman-Martinez sa vjen e thellohet, teksa mësohet se pjesa e vetme e gjetur e trupit të specialistit të paratrupave, është koka e tij pa sy.
Mbetjet mortore të ushtarakut të ri u gjetën në plazhin e Shackelford Banks në Karolinën e Veriut, të cilat u identifikuan nga të dhënat e tij dentare, sipas hetuesve të ushtrisë së SHBA.
Raportimet e mjekësisë ligjore thonin se “plagë të shumta prerjesh me goditje kishin këputur qafën dhe shtyllën e tij kurrizore.
Raporti thoshte më tej: “Edhe pse prerja e kokës është fatale në vetvete, pjesa tjetër e trupit në këtë rast nuk është gjetur, prandaj shkaqe të tjera të mundshme të vdekjes në trung apo në gjymtyrë, nuk mund të përjashtohen”.
Shkaku i vdekjes së Roman-Martinez është listuar si “vrasje me mjete të papërcaktuara”.
Motra e tij Griselda Martinez tha se ishte e shkatërruar të dëgjonte për detajet e gjymtimit të Roman-Martinez: “Për çfarë duhet t’ia bënin këtë? Kjo është shumë e vështirë për ne”.
Hetuesit thanë se para zhdukjes viktima kishte dalë për kamping me shtatë apo tetë ushtarë të tjerë të divizionit ajror, Brigada e 37-të.
Kur ishte shpallur i humbur, ai kishte lënë prapa celularin e tij, portofolin, bluzën që mbante veshur madje dhe syzet që rrallëherë i hiqte.
Ushtarët që ishin me të thanë se hera e fundit që kishin parë Roman-Martinez ishte rreth mesnatës para se të binin për gjumë. Mëngjesin e ardhshëm ata njoftuan policinë për zhdukjen e tij.
Por familja e ushtarakut të ri tha se kishte paqartësi në versionin e kolegëve të tij, të cilët kishin bërë telefonatën e emergjencës pasi autoritete të tjera lokale kishin nisur kërkimet për të zhdukurin, duke u kerkuar ushtareve te zhvendosnin automjetet e tyre.
