Kongresi amerikan do të krijojë një komision të pavarur për të hetuar trazirat që kanë ndodhur në ndërtesën e Kongresit më 6 janar.
Kryesuesja e Dhomës së Përfaqësuesve Nancy Pelosi, ka bërë të ditur këtë vendim më 15 shkurt në një letër dërguar kolegëve demokratë.
Ky Komision do të hetojë dhe raportojë për fakte dhe kauza lidhur me “sulmin e brendshëm terrorist” dhe “ndërhyrjen në transferimin paqësor të pushtetit”, ka thënë ajo.
Pelosi ka angazhuar gjeneralin e pensionuar amerikan, Russel Honore, që të analizojë nevojat për siguri të Kongresit, pas sulmit.
Bazuar në gjetjet e tij fillestare, ai ka thënë se Kongresi duhet të ndajë fonde shtesë për sigurinë e anëtarëve të këtij institucioni.
“Është e qartë nga gjetjet e tij dhe nga gjyqi (kundër ish-presidentit Donald Trump), se na duhet të zbulojmë të vërtetën se si ka ndodhur kjo gjë”, ka thënë Pelosi në letrën e saj.
Mbështetja dypartiake për një komision të pavarur është rritur prej kur Trump është shfajësuar për nxitje të protestave më 13 shkurt.
Disa republikanë kanë thënë se mbështesin hetimin ndaj mbështetësve besnikë të Trumpit, të cilët kanë synuar të ndalin certifikimin final të fitores së Joe Bidenit, në zgjedhjet e 3 nëntorit 2020.
“Duhet të ketë hetim të plotë të asaj që ka ndodhur”, ka thënë senatori Bill Cassidy, një nga shtatë republikanët që kanë votuar për të dënuar Trumpin.
“Çfarë është ditur, kush e ka ditur dhe kur e kanë ditur, të gjitha këto duhet të dihen, sepse kjo ndërton një bazë që diçka e tillë të mos ndodhë kurrë më”.
Cassidy, i cili është censuruar nga republikanët në shtetin e tij pse ka votuar për të dënuar Trumpin, ka thënë se është duke tentuar ta mbajë ish-presidentin përgjegjës.
Ai beson se kur amerikanët të dëgjojnë të gjitha faktet, më shumë njerëz do të pajtohen me pozicionin e tij.
Vota e Senatit për akuzën ndaj Trumpit, “nxitje e kryengritjes” nuk është miratuar më 13 shkurt, pasi për të kundërtën nevojiten dy të tretat e votave.
Megjithatë, kjo votë nuk e ka ndalur debatin për rolin e ish-presidentit në sulm.
Pelosi ka thënë se komisioni do të ketë strukturë të ngjashme me atë që është krijuar pas sulmeve terroriste të 11 shtatorit 2001.
Senatori Chris Coon, demokrat nga Delauer, ka thënë se një hetim i tillë do të detajonte nivelin e përgjegjësisë së Trumpit dhe se si veprimet e tij kanë qenë kundër betimit që ka bërë për mbrojtje të kushtetutës.
“Ka ende të dhëna që njerëzit amerikanë duhet dhe meritojnë t’i dinë, andaj komisioni i sulmeve të 11 shtatorit është një mundësi për t’u siguruar që ne të sigurojmë Kongresin në të ardhmen”, ka thënë Coons.
Si pasojë e sulmit në Kongres kanë mbetur të vdekur pesë persona, duke përfshirë një zyrtar policor.
Deri më tani, më shumë se 200 persona janë akuzuar për krime federale, për shkak të pjesëmarrjes në sulm./REL
