Administrata e presidentit amerikan, Donald Trump ka mohuar kufizimin e hetimeve të FBI-së, lidhur me supozimet e bëra drejt gjykatësit, Brett Kavanaugh, për sjelle të keqe seksuale.
Kavanaugh, është i nominuari i presidentit Trump për gjykatës në Gjykatën Supreme të Shteteve të Bashkuara.
Demokratët janë alarmuar pas raportimeve në mediat amerikane se, Shtëpia e Bardhë është duke kufizuar se kush mund të intervistohet në kuadër të hetimeve.
Presidenti Trump ka urdhëruar nisjen e hetimeve nga ana e FBI-së, pas kërkesës së Komitetit Gjyqësor të Senatit.
Pavarësisht të gjithave, Kavanaugh ka hedhur poshtë të gjitha akuzat kundër tij.
Hetimet e fundit kanë shtyrë votimin përfundimtar për Kavanaugh, i cili në rast të miratimit në Gjykatën më të lartë të SHBA-së, mund të miratonte ligje në të mirë të konservatorëve.
Disa media amerikane kanë raportuar gjatë vikendit se fusha e hetimeve është duke u kontrolluar nga Shtëpia e Bardhë, duke thënë se njëra nga akuzueset e Kavanaugh, Julie Swetnick, nuk do të intervistohet.
Mirëpo Trump ka mohuar ndonjë kufizim, duke thënë se ai ka kërkuar nga FBI-ja të “intervistojë këdo që konsideron adekuat”, në hetimet për të përzgjedhurin e tij në Gjykatën Supreme.
Kush është Kavanaugh?
Demokratja, Dianne Feinsein, pjesë e Komitetit Gjyqësor të Senatit, ka nisur një letër në Shtëpinë e Bardhë, duke bërë thirrje për publikimin e kërkesës së presidentit Trump në hetimet e FBI-së.
Komiteti Gjyqësor i Senatit ka miratuar të emëruarin e presidentit Trump për gjykatës të Gjykatës Supreme, por senatori republikan, Jeff Flake, ka kërkuar hetime nga FBI-ja ndaj gjykatësit Brett Kavanaugh, përpara votimit përfundimtar në Senat.
Brett Kavanaugh dhe akuzuesja Christine Blasey Ford kanë dëshmuar para këtij Komiteti javën e kaluar, me ç’rast Ford ka thënë se është “100 për qind e sigurt” se Kavanaugh e ka sulmuar seksualisht sa kanë qenë të rinj.
Manadati i gjykatësit në Gjykatën Supreme është i përjetshëm dhe kjo gjykatë ka rëndësi të madhe në jetën politike në SHBA.
