Pesë gra nga Taxhikistani janë dënuar me burgim të përjetshëm nga një gjykatë irakiane pasi u shpallën fajtore për pjesëmarrje në radhët e grupit ekstremist, ISIS.
Ambasadori i Taxhikistanit në Irak, Zubaidullo Zubaizoda, ka thënë se zyrtarët e kësaj ambasade kanë qenë të pranishëm në seancën gjyqësore, e cila është mbajtur dje. Në mesin e të dënuarave janë Sadorat Qurbonova, Maftuna Majidova, Gulrukhsor Alieva, Gulbahor Saifulloeva dhe vajza e saj, Mahfuza Qurbonova.
Ky nuk është rasti i vetëm i dënimit të grave të shteteve tjera nga sistemi i drejtësisë në Irak. Sipas të dhënave të autoriteteve të Taxhikistanit, 43 gra nga ky shtet janë dënuar me burgim në Irak për shkak të pjesëmarrjes në luftën e ISIS-it. Vetëm gjatë vitit të kaluar, 13 gra u dënuan me burgim prej 20 vjet deri në burgim të përjetshëm.
Besohet se në mesin e luftëtarëve të ISIS-it janë rreth 1900 qytetarë të Taxhikistanit, të cilët kanë marrë pjesë në aksionet ushtarake të grupit në Siri dhe Irak, shkruan “Free Europe”.