Besimtarët katolikë të qyteteve Kolombo dhe Negombo të Sri-Lankës, të cilat u goditën nga sulmet e përgjakshme me bomba muajin e kaluar, kanë marrë pjesë sot në meshën e parë pas këtyre shpërthimeve. Në disa sulme ishin vrarë më shumë se 250 njerëz.
Policia bëri rojë në hyrjen e kishës “Saint Lucia” të Kolombos, një nga kishat më të mëdha në këtë shtet. Ajo ishte e mbushur me besimtarë, përfshirë shumë prej atyre që kanë humbur familjarë në shpërthimet e 21 prillit, përgjegjësinë për të cilat e mori i ashtuquajturi Shteti Islamik.
Njerëzit që morën pjesë në këto mesha u kontrolluan në hollësi nga policia. Ata nuk kishin të drejtë të bartin çanta dhe rrugët ishin të bllokuara nga ushtarët dhe policët. Pjesëtarë të maskuar të forcave të sigurisë u panë gjithashtu duke patrulluar me motoçikleta.
Nxënësit që ndjekin mësimin në shkolla publike u kthyen në bankat shkollore javën e kaluar. Kampuset ruheshin nga policia dhe nga prindërit u kërkua që çantat e fëmijëve t’i zëvendësojnë me qese të tejdukshme. Megjithatë, shumë fëmijë dhe studentë po mungojnë.
Ndërkaq, shkollat katolike private, të cilat kanë qenë të mbyllura nga data e sulmeve, pritet të hapen të martën e ardhshme.
Në qytetet kryesore të vendit ende vërehet prani e madhe e policisë dhe ushtrisë. Forcat e sigurisë po vazhdojnë kërkimet për personat e dyshuar që e organizuan dhe kryen një ndër sulmet më të përgjakshme në histori të këtij shteti, shkruan “The Guardian”.
