Izraeli i ka hapur vendkalimet kufitare me Rripin e bllokuar të Gazas pasi më parë i kishte mbyllur ato për shkak të shpërthimit të dhunës së përgjakshme disa ditë më parë.
Një zëdhënëse e ministrisë izraelite të mbrojtjes tha se pika kufitare për kalimin e njerëzve, “Erez” dhe pika kufitare për kalimin e mallrave, “Kerem Shalom” janë të hapura dhe po funksionojnë normalisht.
Të dy këto vendkalime ishin mbyllur më 4 maj, kur militantët e Hamasit dhe Xhihadit Islamik hodhën qindra raketa në Izrael dhe ushtria izraelite kreu disa sulme ajrore në Gaza si kundërpërgjigje.
Katër civilë izraelitë dhe 25 palestinezë, përfshirë nëntë militantë, u vranë gjatë luftimeve dyditore, të cilat përfunduan pas arritjes së një marrëveshjeje armëpushimi mes palëve.
Zyrtarët palestinezë thanë se Izraeli është pajtuar që ta lehtësojë bllokadën e gjatë të enklavës së varfër në këmbim të qetësimit të situatës.
Izraeli nuk e ka konfirmuar marrëveshjen, por tashmë e ka larguar ndalesën për barkat palestineze të peshkimit që veprojnë në bregdetin e Gazas.
Izraeli thotë se bllokada është e nevojshme për ta izoluar Hamasin, me të cilët i ka zhvilluar tri luftëra nga viti 2008. Sidoqoftë, analistët thonë se kjo bllokadë është dënim kolektiv ndaj dy milionë banorëve të Gazas, shkruan “AFP”.
