Kreu i Komandës Qendrore të Ushtrisë amerikane, Kenneth F. McKenzie, tha se prezenca e grupit ekstremist Shteti Islamik (IS) në Afganistan, mbetet “shumë shqetësuese”, por nuk ka gjasa që ky grup të ndërmarrë sulme në Shtetet e Bashkuara, pasi gjendet nën presion të fuqishëm ushtarak.
Gjenerali amerikan u tha gazetarëve se grupi ekstremist “me siguri ka aspirata për të sulmuar Shtetet e Bashkuara”.
“Është mëse e qartë se për sa kohë ne të mbajmë presionin mbi ata, do ta kenë të vështirë t’i realizojnë këto plane”, tha gjenerali Kenneth F. McKenzie.
Operacionet e ushtrisë amerikane në Lindje të Mesme janë nën menaxhimin e gjeneralit McKenzei. Gjatë ditëve të kaluara, ai zhvilloi vizita në Katar, Irak, Arabinë Saudite, Emiratet e Bashkuara Arabe dhe Egjipt.
Agjencia e lajmeve "Associated Press" ka cituar këtë javë, disa zyrtarë amerikanë dhe afganë të kenë thënë se grupi ekstremist e ka rritur prezencën e tij në Afganistan, duke rekrutuar pjesëtarë të rinjë dhe kanë planifikuar sulme në Shtetet e Bashkuara dhe vendet tjera perëndimore.
Gjenerali McKenzei tha se nuk beson që IS-i ka zgjeruar aftësitë e tij, por që ende paraqet një prani të rrezikshme në Afganistan.
Disa ekspertë të çështjeve të sigurisë kanë thënë se IS-i ka mijëra luftëtarë në Afganistan.
Forcat e Shtetet e Bashkuara janë duke luftuar me pjesëtarët e IS-it në Afganistan, një mision ky i ndarë nga ndihma që amerikanët u ofrojnë forcave afgane në ballafaqimin e tyre me militantët talibanë.
