Të paktën 18 militantë janë vrarë nga sulmet ajrore që kishin cak forcat e përkrahura nga Irani dhe grupet aleate të tyre. Lajmin e bëri të ditur një grup monitorues i luftës.
Monitoruesi Sirian për të Drejtat e Njeriut me bazë në Britani njoftoi të hënën se sulmet ajrore nga aeroplanë të paidentifikuar ndodhën në rajonin Al-Bukamal, afër kufirit me Irakun.
Kjo organizatë tha se cak i sulmeve ishin pikat e kontrollit, automjetet ushtarake dhe depot ushtarake, me ç’rast janë shkaktuar dëme të mëdha materiale.
Monitoruesi tha se numri i viktimave nga këto sulme ajrore mund të rritet.
Izraeli e cilëson Iranin si kërcënimin më të madh dhe javëve të fundit i ka sulmuar caqet e lidhura me këtë shtet në Siri, Irak dhe Liban.
Irani dhe Rusia i kanë dhënë mbështetje të madhe presidentit sirian, Bashar al-Assad gjatë luftës civile në Siri. Lufta kishte filluar me shtypjen e protestave nga forcat qeveritare në mars të vitit 2011, shkruan “Free Europe”.