Koreja e Jugut ka mbajtur një takim të sigurisë emergjente, pasi Koreja e Veriut e kërcënoi me ndërmarrjen e veprimeve ushtarake kundër shtetit fqinj.
Sipas mediave të huaja, zyrtarët në Seul i kërkuan Koresë së Veriut të mbështesë marrëveshjet e pajtimit, në mesin e tensioneve ndërkufitare.
Ndërkohë Drejtori i Sigurisë Kombëtare në Korenë e Jugut, Chung Eui-yong, mbajti të dielën një video-konferencë urgjente, me ministrat përgjegjës për sa i përket sigurisë, si dhe me gjeneralët ushtarakë. Ata diskutuan për situatën e fundit në “Gadishullin Korean” dhe hapat e mundshëm të qeverisë.
Lidhur me këtë rast Ministria e Unifikimit, e cila merret me marrëdhëniet me Korenë e Veriut, lëshoi më vonë një deklaratë duke thënë se të dy palët duhet të respektojnë të gjitha marrëveshjet e ofruara. Ndër tjerash institucioni tha që Korea e Jugut e sheh të rëndë situatën aktuale.
Ndryshe, të shtunën motra e liderit suprem të Koresë së Veriut Kim Jong Un, Kim Yo-Jong, ka kërcënuar me veprim ushtarak kundër Koresë së Jugut teksa kritikonte Seulin për përkeqësimin e marrëdhënieve bilaterale dhe paaftësinë për të ndaluar aktivistët që shfaqin parulla kundër Penianit në kufirin mes vendeve.
