Televizioni shtetëror i Koresë së Veriut ka publikuar pamje nga momentet e dezinfektimit nga ana e punonjësve në një seri institucionesh në Phenian, në një përpjekje për të eliminuar çdo gjurmë të koronavirusit.
Autoritetet vendosën të izolojnë tërësisht qytetin Kaesong, në kufi me Korenë e Jugut, pasi sipas mediave vendase, atje u shënua rasti i parë i konfirmuar me COVID-19.
Masa strikte karantine dhe vëzhgime janë adaptuar në mbarë vendin, ndërsa ka nisur edhe testimi i popullsisë teksa autoritetet janë furnizuar me pajisjet dhe veshjet mbrojtëse, raporton agjencia e lajmeve KCNA.
Mbrëmjen e së dielës, lideri koreano-verior, Kim Jong Un shpalli në vend gjendjen e emergjencës shëndetësore pasi një person që kishte braktisur vendin 3 vjet më parë drejt Koresë së Jugut, ishte kthyer këtë muaj përmes qytetit Kaesong, me simptoma të COVID-19.
Që prej 16 korrikut në Korenë e Veriut janë raportuar 1 mijë e 211 testime, por të gjitha, gjithnjë sipas KCNA, kanë rezultuar negative për SarsCov2.
Ndërkohë sipas raportimeve të OBSH, 696 shtetas me kombësi të huaj në Phenian janë vendosur në karantinë.