Një ekspert i lartë mjekësor kinez është shprehur ditën e sotme se akuzat e bëra ndaj Kinës lidhur me hetimin e OBSH-së nuk kanë asnjë bazë faktesh.
Pas botimit të studimit të përbashkët për origjinën e COVID-19 nga Kina dhe OBSH të martën, Drejtori i Përgjithshëm i agjencisë së shëndetit, Tedros Adhanom Ghebreyesus tha se Kina kishte mbajtur të dhëna nga hetuesit ndërkombëtarë, raporton Reuters
Por Liang Wannian, i cili ishte bashkë-udhëheqës i studimit të përbashkët, u tha gazetarëve se studiuesit nga të dy palët kishin akses në të njëjtat të dhëna gjatë gjithë hetimit dhe se pohimet për mungesën e aksesit nuk ishin të sakta.
“Sigurisht, sipas ligjit kinez, disa të dhëna nuk mund të merren ose fotografohen, por kur po i analizonim së bashku në Wuhan, të gjithë mund të shihnin bazën e të dhënave, materialet – e gjitha u bë së bashku”, tha ai.
Duke iu përgjigjur pretendimeve se paneli i ekspertëve nuk kishte qasje në grupe të plota të të dhënave dhe mostra, Liang tha se asnjë shkencëtar nuk pati kurrë “informacion të përsosur.”
Ai gjithashtu hodhi poshtë ankesat se botimi i raportit ishte vonuar në mënyrë të përsëritur, duke vërejtur se “çdo fjali, çdo përfundim, çdo pjesë e të dhënave” duhej të verifikohej nga të dy palët para se të mund të lëshohej.
“Gjatë gjithë kohës ne gjithmonë mbështesim parimin se cilësia vjen e para, tha Liang, i cili është kreu i një komiteti ekspertësh për COVID-19 të ngritur nga Komisioni Kombëtar i Shëndetit i Kinës. Kujtojmë se studimi i përbashkët arriti në përfundimin se origjina më e mundshme e COVID-19 ishte tek kafshët, dhe ndoshta kaloi nëpër një specie ndërmjetësuese para se të kalonte tek njerëzit.
