Ministria e Brendshme e Irakut tha të dielën se 82 persona humbën jetën dhe 110 u plagosën në një zjarr katastrofik që shpërtheu në një pavion të kujdesit intensiv në spitalin e Bagdatit ku ishin të shtruar pacientë në gjendje të rëndë nga koronavirusi.
Neglizhenca e autoriteteve të spitalit është fajësuar për zjarrin e së shtunës, që sipas njoftimeve fillestare u shkaktua kur një bombol oksigjeni shpërtheu në pavionin e spitalit Ibn al-Khatib. Kryeministri i Irakut shkarkoi disa zyrtarë kryesorë të spitalit disa orë pas incidentit katastrofik dhe në vazhdim edhe vetë ministrin e shëndetësisë.
Ndër të vdekurit janë të paktën 28 pacientë që ishin vendosur në respiratorë ndërsa përballeshin me simptoma të rënda të virusit, shkruajti në Twitter Ali al-Bayati, zëdhënës i Komisionit të pavarur për Të Drejtat e Njeriut. Komisioni është një strukturë gjysëm-zyrtare.
Zjarrfikësit luftuan me flakët që kishin përfshirë të gjithë katin e dytë të spitalit. Ekipet e mbrojtjes civile vazhduan shuarjen e zjarrit deri në orët e para të mëngjesit.
Ambulancat transportuan dhjetëra të plagosur. Ministria e Shëndetësisë thotë se të paktën 200 persona u shpëtuan.
Doktorët në vendngjarje ishin të rrënuar psikologjikisht nga kaosi përreth. Ata thanë se trupa të shumtë të shkrumbuar u nxorën jashtë spitalit nga ekipet e emergjencës.
Deri në mesditën e së dielës, të afërmit ende kërkonin njerëzit e tyre.
Qeveria e SHBA është në kontakt me zyrtarët irakianë dhe ka ofruar mbështetje, tha këshilltari i Shtëpisë së Bardhë për sigurinë kombëtare Jake Sullivan në një deklaratë.
“Ju lutem, dy nga të afërmit e mi nuk gjenden... Do të vdes (nëse nuk dëgjoj prej tyre)”, shkruante një grua në mediat sociale, pas kërkimit pa sukses për anëtarët e familjes së saj. “Shpresoj të na ndihmojë dikush që të gjejmë Sadi Abdul Kareem dhe Samir Abdul Kareem; ishin të shtruar në pavionin e kujdesit intensiv”.
Zjarri ndodhi ndërsa Iraku po përballet me një valë të dytë të rrezikshme të pandemisë së koronavirusit. Rastet ditore të infektimeve janë gati 8 mijë, shifra më e lartë kjo që kur Iraku filloi të regjistrojë infektimet e reja në fillim të vitit të kaluar. Të paktën 15200 njerëz kanë vdekur nga koronavirusi në Irak, nga një total prej 100 mijë të infektuarish.
Fillimisht, Kryeministri Mustafa al-Kadhimi shkarkoi drejtorin e përgjithshëm të Departamentit të Shëndetësisë në zonën ku ndodhet spitali. Ai gjithashtu shkarkoi drejtorin e spitalit Ibh al-Khatib dhe drejtorin e inxhinierisë dhe mirëmbajtjes, thuhet në një deklaratë për shtyp.
Pas shpërthimit të zjarrit, kryeministri al-Kadhimi mbajti një takim emergjence në shtabin e Komandës Operacionale të Bagdatit, e cila koordinon forcat irakiane të sigurisë, thuhet në një njoftim në llogarinë e tij në Twitter.
Në takim, ai tha se incidenti ndodhi për shkak të neglizhencës.
“Neglizhenca në këto çështje nuk është një gabim, por një krim për të cilin duhet të mbajnë përgjegjësi të gjitha palët neglizhuese”, tha ai. Ai u dha autoriteteve irakiane 24 orë kohë për të paraqitur konkluzionet e hetimit.
E dërguara e OKB-së në Irak, Jeannine Hennis-Plasschaert shprehu në një deklaratë “tronditje dhe dhimbje” për incidentin, si dhe bëri thirrje për masa më të forta mbrojtëse në spitale./VOA
