Miliona afganë janë në rrezik urie për shkak të kombinimit të konfliktit, thatësirës dhe pandemisë koronavirus, tha sot kreu i Programit Botëror të Ushqimit (WFP), duke u bërë thirrje udhëheqësve politikë që të veprojnë urgjentisht.
"Një stuhi e të gjitha stuhive po vjen për shkak të thatësirës, konflikteve, kolapsit ekonomik të përkeqësuar nga COVID", tha David Beasley për Reuters në Doha, duke shtuar se numri i njerëzve në rrezik urie tani është rritur në 14 milionë.
WFP ka paralajmëruar se Afganistani është në rrezik nga një katastrofë humanitare nëse ajo agjenci e Kombeve të Bashkuara nuk arrin të mbledhë 200 milionë dollarë deri në shtator.
Afganistani po përballet me kolaps ekonomik pasi vendet dhe institucionet e huaja njoftuan se do të pezullojnë ndihmat dhe rezervat e parave që kur talibanët pushtuan kryeqytetin, Kabul, më 15 gusht.
Beasley tha se bashkësia ndërkombëtare përballet me vendime shumë të vështira dhe paralajmëroi se afganët do të jenë "ferr në tokë" nëse situata ekonomike përkeqësohet.
"Populli i Afganistanit ka nevojë për ndihmë menjëherë," tha ai.
Numri i njerëzve që kanë nevojë për ndihmë nga WFP mund të dyfishohet nëse bashkësia ndërkombëtare "u kthen shpinën" afganëve.
