Fitore e papritur për skuadrën kaliforniane ndaj OKC.
Fitore e rëndësishme e Los Angeles Lakers 138-128 në vazhdime në shtëpinë e Oklahoma City Thunder.
Në mungesë të LeBron James rolin e protagonistit për skuadrën kaliforniane e mori Kyle Kuzma, që realizoi në total 32 pikë, i ndihmuar edhe nga 26 pikët dhe 12 kërcimet e Ivica Zubac.
Nuk mjaftoi për Thunder loja e mirë e Paul George dhe Russell Wesbrook, që shënuan respektivisht 27 dhe 26 pikë.
Vuajtën më shumë nga ç’parashikohej Toronto Raptors, që gjithsesi mposhtën 111-109 Phoenix Suns, falë një realizimi të Pascal Siakam në sekondat e fundit të ndeshjes. Serge Ibaka ishte më i miri për kanadezët me 22 pikë, ndërsa Kyle Lowry shtoi edhe 16 pikë të tjera. Për Suns nuk mjaftuan 30 pikët e Devin Booker.
E thjeshtë për Denver Nuggets përballja me Chicago Bulls, që u dorëzuan pa kushte me rezultatin e thellë 135-105.
Pas një çereku të parë të mirë (28-30), Bulls pësuan një rënie drastike, duke u lënë shumë hapësira Jamal Murrayt dhe Nikola Jokiqit, që e mbyllën ndeshjen me 25 dhe 18 pikë të realizuara.
Philadelphia 76ers triumfoi 120-96 në parketin e Indiana Pacers, takim ku u dalluan Jimmy Butler me 27 pikë dhe Joel Embiid me 22 pikë.
