Gjyqtarët sportivë, në çdo disiplinë sportive kanë qenë halë në sy për regjimin e Serbisë.
As shantazhet dhe as kërcënimet e Kuzhinës së Beogradit, nuk munden t’i ndalin gjyqtarët sportivë në vitet 1991-1999, që të ndajnë drejtësinë në garat e Republikës së Kosovës.
Shqiptarët ishin të bashkuar si kurrë në të gjitha sferat, duke luftuar okupatorin serb.
Muhamet Ahma i takon Gjeneratës së Republikës! Ahma ka qenë prej gjyqtarëve më të dalluar të basketbollit në vitet e 90-ta.
Gjyqtar që gëzonte respekt kudo në atëkohë, ishte i respektuar, i dashur, i vendosur dhe personalitet që nuk e kishte shoqin në sport.
Ai nuk u ndal asnjëherë dhe as që u merakoste fort për kërcënimet që i vinin nga agresori serb, por me krenari i ka drejtuar ndeshjet e basketbollit në kuadër të Republikës së Kosovës në vitet e 90-ta, në fusha dhe salla të improvizuara.
Ai është krenar që i takoi asaj periudhe të rëndë, për faktin se uniforma e gjyqtarit sportiv për bandat dhe milicinë e pushtuesit serb, ishte sikur një uniformë ushtarake apo sikur një plumb në lule të ballit.
Ahma kreu misionin e tij me sukses dhe që besa në atëkohë, ishte i gatshëm edhe të vdes për sportin dhe shtetin e Kosovës.
