Sportisti i Shekullit, Aziz Salihu, kryetar i klubit të boksit Prishtina, kritikon Federatën e Boksit të Kosovës, duke thënë se gabuan shumë me boksierët që pa përgatitë i dërguan në turneun e 71-të ndërkombëtar “Strandja”, që u mbajt në Bullgari. “Është një gjë që duhet ditur, jo mu lavdëruar.
Në vend që me shku në turne ku merr pikë olimpike, ata shkojnë në Stranxhat, që nuk e ka famën e para 30 viteve, më nuk është turne i fortë. Duhet mi ruajt boksierët, jo mi çu në turne pa vlerë. Kjo është katastrofë e madhe për federatën dhe nuk është dashur me shku në Strandja”, kritikon Salihu.
Ai konfirmon se do të konkurrojë për kryetar federate. “Faji është i federatës, s’ka federatë, gjynah qysh janë mbetur, duhet me marr e me mbajt kuvendin edhe ta zgjedhim kryetarin.
Po unë vetë kam mu kandidatuar për kryetar, e dini vetë se ku isha selektor, i çoja boksierët nga dy muaj në përgatitje edhe e kisha mposht me 22:0 Bullgarinë, që është fuqi e madhe në botë.
Sa më shumë përgatitje, e jo veç mi çu e mu rreh e mu rreh boksierët, nuk është mirë. Duhet më shumë mi ruajt boksierët jo me shit mend dhe me thënë unë, s’ka unë”, përfundoi Salihu.